Read Ibibiliya mu Shimakonde Imbodi Yaambi na dimbande dya Imbodi Yakala Yudashi 1 Bible Online

Yudashi 1 - Ibibiliya mu Shimakonde Imbodi Yaambi na dimbande dya Imbodi Yakala bible

Yudashi 1

¹Nangu Yudashi ntumwa umwe Yesu Klistu na nene ni nung'une Tiyagu, kwenu mwenu mmakushamegwa múnagwaleka nkati mumwe Nnungu Atata na múshungigwa kwamwaa umwe Yesu Klistu.

²Shididi, amani na linagwaledyo vinu avi kwenu mwenu vyanjadyeke.

³Mmakunagwaleka, ata ikava kenga ngushindatumbama yakumwandikila kwamwaa wakwambolegwa kwaupamo, ndyona kudyanga nimwandikile ninnaililila pakulota mushililidye likulupililo lyavapatile vakwilimyanga kwamwanda umo tu bai.

⁴Mwaa vanu vanji vandiliinjidyanga shipiipii, vanavo ukumu yave indipangigwa tangu nakala, vanu vákave Nnungu vatindinganiánga umonyo wa Nnungu wetu pakulota shive shinu shakulaukila na vankumwita Nang'olo wetu jumo, jo UMU wetu, Yesu Klistu.

⁵Ata ikava kenga mwenu mundilipundisha tayali, ninkulota ninkumbuwange doni UMU[1] andívaambola venentete kushilambo sha ku Mishili kanji ling'oto andívabamola avalá vákakulupidile.

⁶Namomo vanjelo vakanyalidíle sheo shave vo vene bai vandíleka mautu ave, nadoni Nnungu andivakondya kushii vàvaungile mang'unyang'unya ákamalilika pakulota vaukumigwe muliduva alilá likumene.

⁷Kenga mwaivalaléle makaja a ku Shodoma na Gomola na makaja ashitanono, anavo ankuva kenga mpano washaushanga shamoto úkamalilika; venentete vandílipalakedya muvyakulauka na kuvingilidya malotelo ákavele ashivalakwelo.

⁸Nimumo momo vanu vovo vo, vakulupila dindoti kwaupande unji vankwambukisha mili vyave, kwaupande unji kwita unashilangola na kwaupande unji kuvakupulu valishangelo.

⁹Doni, ata jo Migele nang'olo wavanjelo pashitaukananga namu Ndamoni vapwatanila mili umwe Musha, nae halyalaveke kumya ukumu yakukupulu kanji atédoni, “UMU akushulange.”

¹⁰Vovo vo, vankukupulu vinu vyavakamanyite, namomo kwavinu vyavamanya kwamavalelo, nkati muvyanavo vinkuvabamola kenga vakoko vákave ding'ano.

¹¹Vapambale! Mwaa vanavo vankwodedya indila yoyo imwe Kaimu[2] kwamwaa wapaida, vanavo vandiliinjidyanga mumakosha lolo amwe Balaau,[3] nimumo momo vandabamolegwa nkati mukupinga kumwe Kola.[4]

¹²Vanu avo vankuva kenga vyongo muvikukulu vyenu vyalinagwaledyo vyamutenda valya namu mwenu kwabila ishima. Vovo vo, ni vakushunga valilísha vo vene. Maundi ákave imbula akunguluka na imepo; milandi víkapa vyepo muwakati uvaikidíle, vibubulígwe na vipadíle myanda mivili;

¹³vankuva kenga mawimbi akujowa amwimanga, vitendo vyave vyadoni ni shulu shakunyata; namomo vankuva kenga dinondo diwanawananga díkave lyutu; kwavanavo vandivakandyedya ngwengwe lyutu lyakudimba do, pii.

¹⁴Kwamwaa wavanu vovo ava, Enoki munu wasaba kutunduvangila Adamu nanae momo andívalanganga kaladavo, “Mwenu! UMU ankwida pamo na makumi manga avanjelo vake vakwilimyanga

¹⁵pakulota kuvaukumu uti na kuvapa shaushanga avalá vákave Nnungu muvitendo vyave uti vyaungave Nnungu vyavatandile na kwamwaa wamalove uti akupwateka avashitangola vakutega vákave Nnungu vamwamba nae.”

¹⁶Vanu avo vankunama vatangadikanga ngwengwe, vakashalya, vaodedya malotelo ave vo vene, vankulitapila na kutangola malove anagwaléka kwambangidya vapate paida yavo vo vene.

¹⁷Kanji napane mwenu mmakunagwaleka, kumbukila malove alalá avammanyiidye kunantandi vamyombe vamwe UMU wetu Yesu Klistu.

¹⁸Vanavo vashindamwaulila mwenu doni, “Muwakati wamwisho vandaumilila vakuliula vawena vaodedya malotelo aungave Nnungu.”

¹⁹Ava ni vatádya kupagwe kwapukananga pakati penu, vanu vamakumbukililo ashivalakwelo na vákave Imumu.

²⁰Kanji napane mwenu mmakunagwaleka, mulidenga nkati mulikulupililo lyenu lyakwilimyanga-uti, mushwalya nkati mu Imumu Wanashwe,

²¹nanopa nkati mulinagwaledyo lyake Nnungu akuno mulindila shididi shake UMU wetu Yesu Klistu pakulota shintwale muke kushingumi shíkamalilika.

²²Kwaupande unji avanavo shididi kwa avalá vaambambídya,

²³kwavanji vaambole muvajakola pamoto; kwaupande unji avanavo shididi mujopa kwambukishigwa muvangedya ata mpaka dinguvo dyave dyaushapu.

²⁴Mwenu, kwa aijá Wadimongo pakulota kunshililidya mwenu hamunalikuvale na kwambangidya akamwimidye múkave makosha pamevo palishangelo lyake kwalipuwilo likumene,

²⁵kwake Nnungu ávele jumo, Mwamboli wetu, lipagwe lishangelo, ukumene, lyululilo na madalaka kwaindila imwe Yesu Klistu UMU wetu, kutunduvangila wakati uti, ambi apa na mpaka vyaka uti! Ame.