Read Ibibiliya mu Shimakonde Imbodi Yaambi na dimbande dya Imbodi Yakala Maono 1 Bible Online

Maono 1 - Ibibiliya mu Shimakonde Imbodi Yaambi na dimbande dya Imbodi Yakala bible

Maono 1

¹Maono amwe Yesu Klistu áumidye Nnungu pakulota kuvamanyiya vatumika vake vinu vivaikidíle vitandeke ambi popa. Nae anintumidya njelo wake kwida nammalangila ntumika wake walina Nshuwau,

²Nshuwau andivalanganga uti vyagwene mulilove lya Nnungu na ushuda umwe Yesu Klistu.

³Andyalaligwa aijá áshomya na vandyalaligwa avalá vaigwilíla malove amaono ala na kuvikila kuntima vinu uti vyandikíke; mwaa wakati undivandika.

⁴Nangu Nshuwau ninkwandikila maganisha saba avéle ku Ashiya, umonyo na amani vyakwalakela kumwe aijá ápagwite, e apagwíte na álota kwida. Namomo vyakwalakela kwa adilá dimumu saba divéle pepi-pepi na pashiteng'u shake

⁵na vyakwalakela kumwe Yesu Klistu nshuda wakukulupilika, ntandi kudyuka pakati pavakupela na nkútawala wavaumu vamushilambo. Nae ankutunagwaledya na kwamyadi vyake anditwambola mumadambi etu,

⁶jojo jo kutwala kututenda kuva utawala, vakulangalalela-shadaka kwa Nnungu wake, jo Tatamunu. Kwake nae lipagwe lishangelo na lyululilo ngwengwe ngwengwe! Ame.

⁷Mwe! Nae ankwida mumaundi[1] na kula munu andamwona ata mpaka avalá vantalwéle nkushi;[2] makola uti amushilambo andatangadikanga kwamwaa wake nae. Nadoni amu mundatandeka! Ame.

⁸“Nangu ni Alupa na Omega,”[3] atangola UMU Nnungu, “jojo ápagwite, e apagwíte na álota kwida, ni Wadimongo-uti.”

⁹Nangu Nshuwau ninung'unumunu na ninjenu ngúpagwa pamo namu mwenu mumauvilo, muutawala na mukunanopa nkati mumwe Yesu. Ndípagwa pashitingi shavashema Patimu kwamwaa walilove lya Nnungu na ushuda umwe Yesu.

¹⁰Napane muliduva limwe UMU ndítwaligwa mu Imumu kutwala kunyuma kwangu kwigwa lidi likumene kenga lipalapanda

¹¹liishidoni, “Vyawona avi andika mushidingo shalyamba utwa utumidye mmaganisha saba avéle ku Ashiya: Epeshu, Eshimilina, Peligamu, Tiyatila, Shalideshi, Piladelipiya namu Laudisheya.”

¹²Napanelo ndíshiliuka kunnola nyani áshitangola namu nangu; pangushiliwike, ndyóna ditaa saba dyashaabu[4]

¹³na pakati paditaa adyo, andípagwa munu ávele kenga Mwana Wamunu[5] àgwete ikanju íshiwika mpaka mmadodo na àlyungile nkanda washaabu pashuva pake.

¹⁴Muti na ugwimbu uvele wanashwe kenga pamba kwali kenga itabwe,[6] mevo ake kuva kenga lilamba lyamoto,[7]

¹⁵madodo ake kuva kenga lyava lyavataile nshasha lyumíle palitungulu,[8] lidi lyake kuva kenga libububu lyamedi,[9]

¹⁶munkanakono wake kunyukata dinondo saba, nkanywa mwake kuma lyambila lyakukola kuvili[10] na ing'ope yake kuva yakushenga kenga liduva palivala na dimongo.

¹⁷Paningwene, ndígwa mmadodo mwake kenga ndipela. Bai nae anínguvika nkono wake wakunkanakono kutwala kushidoni, “Haunajope! Nangu ni Nantandi na Wamwisho.

¹⁸Nangu Ninene Ngúnama; ndípela kanji napane lola, ninkunama ngwengwe ngwengwe! Nangu ni Nimwene myungulilo vyungulíla Kupela na Kumoka.

¹⁹“Napanelo andika vinu vyaugwene, vipagwíte na vilóta kutandeka ling'oto lya avi.

²⁰Shipii shadinondo saba dyaugwene munkono wangu wakunkanakono na shipii shaditaa saba dyashaabu, mana ake ni ala: dinondo saba ni vanjelo vamaganisha saba na ditaa saba dyashaabu ni maganisha saba.