Read Ibibiliya mu Shimakonde Imbodi Yaambi na dimbande dya Imbodi Yakala Maono 10 Bible Online

Maono 10 - Ibibiliya mu Shimakonde Imbodi Yaambi na dimbande dya Imbodi Yakala bible

Maono 10

¹Napanelo ndímwona njelo junji wadimongo ashuluka kuwa. Njelo ajo lindímwinikidyanga lyundi, pamuti pake kupagwa yuvi. Ing'ope yake kushenga kenga liduva kutwala madodo ake kuva kenga mabodo amoto.

²Nae mmakono mwake andínyukata shidingo shidikidiki shìdingukenge. Lidodo lyankanakono àlivete mwimanga na lyanshanda àlivete kumwangu

³atangola na lidi likumene kenga lidi lyantumi. Akatangole, ding'uva saba adilá dindyúmya madi ave.

⁴Akaume madi ading'uva saba adyo, nangu ngubakidile padyoko na kwandika kanji ndígwa lidi lyakwalakela kuwa liishidoni, “Vinu vitangaléke na ding'uva saba dyo, piya; haunandike!”

⁵Napanelo njelo aijá waningwene àimidile mwimanga na kumwangu, andínyaladyedya nkanankono wake kuwa

⁶kutwala kulilapila kumwe aijá ánama ngwengwe ngwengwe, ákandyenge kuwa na uti vivéle ako, pai na uti vivéle amo, imanga na uti vivéle amo aashidoni, “Wakati wakutimatimanga undipita:

⁷napane mumaduva álota kwomba lipalapanda aijá njelo wasaba, undawikila popo nnugu washipii shake Nnungu kenga mwavavalangangidile vatumika vake, vo vakulava.”

⁸Napanelo lidi lyakwalakela kuwa lyangwigwíte alilá lindítangola kavili namu nangu liishidoni, “Katwale shidingo shidingukénge ashilá shivéle mmakono mwake njelo áimidile mwimanga na kumwangu.”

⁹Nangu ndímuukila njelo kutwala kunjugwa angupe shidingo shidikidiki ashilá. Nae kungwaulila doni, “Twala ulye. Shanavo munda mwako shindakalala ila nkanywa mwako mo shindanogwa kenga ushi.”

¹⁰Bai shidingo shangutwéte mmakono mwanjelo kulya ashilá, pangushilya po, nkanywa amu shishindanogwa kenga ushi kanji ndikamile, munda ni kukalala doni.

¹¹Napane vaníngwaulila doni, “Indikuvaikila ulave kavili kwamwaa wavenentete voe, vilambo, dinangodi pamo na vaumu.”