Read Ibibiliya mu Shimakonde Imbodi Yaambi na dimbande dya Imbodi Yakala Maono 11 Bible Online

Maono 11 - Ibibiliya mu Shimakonde Imbodi Yaambi na dimbande dya Imbodi Yakala bible

Maono 11

¹Napanelo vaníngupa lupambai luvéle mwannandi wavanapimila kutwala kungwaulila doni, “Takatuka ukapime ing'ande yake Nnungu, alutali na uvavalange vanu valipúdya nng'ande mo.

²Ila nshana wo leka, haunapime mwaa wanavo vandivajaulila vamidi. Vovo vo, vandakandanga njini wakwilimyanga mumyedi alubaini na mbili.

³“Nene ndavapa lilamulo vashuda vangu vavili, vanavo vandalava mumaduva alupu imo dimiya mbili na sitini vàgwalenge maguni.”

⁴Vashuda vavili avo ni milandi mivili vyaulivela na dikalaboi mbili dipágwa mushu mumwe UMU washilambo.

⁵Munu álota kulingangila kuvatenda kunyata, ndikanywa mwave mundauma moto wakuvalya vammongo vave. Amu ni muvaikidíle kupalangila avalá valóta kuvatenda kunyata vanu avo.

⁶Vanavo vandivanavo madalaka akushima kuwa kwambangidya imbula hainatonye muwakati wavalava. Namomo vandivanavo lilamulo lyakujalulanga medi kuva myadi na kubyaa shilambo kwakula inamuna yavyaushanga, myanda vyo vyavalota vene.

⁷Napanelo pavamalila ushuda wave, lidimu wakwalakela ku Litavaleva andavatenda ing'ondo kutwala kuvatema na kuvabyaa.

⁸Mitui vyave vindapagwa mwibalabala ing'umene yapanjini kwakulinganianga vila vashema Shodoma kwali Mishili palyutu lyavankamadile momo UMU wave.

⁹Vanji pakati pavenentete, makola, dinangodi na vilambo, vandalola mitui vyave mumaduva matatu na nushu; vanavo vandaleya pakulota mitui avyo vinashikigwe.

¹⁰Vanu vanáma mushilambo shapai vandapuwanga kwamwaa wave, vandatenda shikukulu na vandajaulanila vibuku. Mwaa vakulava vovo vo, vandivaangaishanga namene vanu vanáma mushilambo shapai.

¹¹Ling'oto lyamaduva matatu na nushu alalá, imumu yashingumi yakwalakela kwa Nnungu kwinjila mumitui amulá kutwala mitui vyo kutakatukanga kwimila. Napane vanu vavagwéne kundivakumba kujopa kukumene namene.

¹²Bai vashuda avalá vandígwa lidi lyadimongo lyakwalakela kuwa liishidoni, “Kwela mwide kuno.” Vanavo vandikwela kuka kuwa mulyundi akuno vammongo vave valola ndoo.

¹³Muwakati wowo shindyúmilila shindangenda shakujowa kutwala imbande imo yakumi yanjini kubamoka. Shindangenda shosho sho, vandípela vanu dyalupu saba, vabakidíle vo, kundívaida kujopa na vandímupa lishangelo Nnungu wakuwa.

¹⁴Apambale wambili andipita. Kanji mwe! Apambale wantatu ankwida shipajelo.

¹⁵Njelo wasaba andyómba lipalapanda kuwa ko kwigwinika madi adimongo ashishidoni, “Utawala wamushilambo shapai, ambi apa uvelé mmakono mwa UMU wetu jo Klistu wake;[16] nae andatawala ngwengwe ngwengwe.”

¹⁶Napanelo avalá vanang'olo ishilini na nsheshe ve vaikalénge muviteng'u vivéle pamevo pake Nnungu, vandítepa vyenye vyave kundondya pai valipudya kwa Nnungu

¹⁷vaashidoni, “Tunkukulambwalela UMU Nnungu Wadimongo-uti úpagwite na we upagwíte mwaa undilodya dimongo dyako ding'umene na unditunduvanga kutawala.

¹⁸Venentete vandishimwa kanji shitundi shako shindiwika.[17] Undiwika wakati wakuvaukumu vapadíle na wakuvatudya vakulava vatumika vako na vakwilimyanga, uti avalá vajópa lina lyako, vadyoko na vanang'olo. Ni wakati wakuvabamola uti avalá vabamóla shilambo.”

¹⁹Napanelo ing'ande yake Nnungu kuwa ko indíshimuka, nng'ande mo kutwala kwaneka lishanduku lyaimbodi yake Nnungu. Nadoni kundyúmilila kumeta, shilindimu, ding'uva, shindangenda na kutonya imbula ing'umene yadinyanga.