Read Ibibiliya mu Shimakonde Imbodi Yaambi na dimbande dya Imbodi Yakala Maono 12 Bible Online

Maono 12 - Ibibiliya mu Shimakonde Imbodi Yaambi na dimbande dya Imbodi Yakala bible

Maono 12

¹Napanelo kuwa kundyáneka shimanyikilo shakutikinikanga: nkongwe jumo àgwete liduva, mwedi ùvele mmadodo mwake na lidaka lyadinondo kumi na mbili lìvele mmuti mwake.

²Jojo jo, andívanavo shitumbo na ashindakutakutanga mwaa wamauvilo akushuluwa kwoda undivandika wakati wake.

³Namomo ko kuwa ko kundyáneka shimanyikilo shinji: mwe! Lijoka likumene lyanauvi lyakuvanavo myuti saba na dimembe kumi, myuti mo kuvanavo madaka saba.

⁴Nshila wake andíkumba imbandi yantatu yadinondo dyakuwa kutwala kupakatiyangidya pai. Lijoka andíimila pepi na pavéle nkongwe aijá ávandike na kushuluwa annindila mwana palota kuvalekwa, ammile.

⁵Nkongwe jo anímmaleka mwana nnume, munu álota kuvalangalela venentete na ipimbo yashitali. Kanji jo mwanamunu jo andíkwapuligwa kuka ndapagwa namu Nnungu pashiteng'u shake.

⁶Kutwala nkongwe kutukutila kushimbweshe kulyutu lyampanganiangidídye Nnungu kwambangidya vannishe muda wamaduva alupu imo dimiya mbili na sitini.

⁷Napanelo kuwa indyúmilila ing'ondo: Migele pamo na vanjelo vake vandyúka nantenda ing'ondo aijá lijoka nanae lijoka na vanjelo vake kujang'ula moto.

⁸Kanji lijoka aijá dinímpunguka dimongo, nadoni vandíkatoka lyutu lyave kuwa.

⁹Napanelo lijoka likumene alilá lindíjalegwa pai. Aju ni jojo aijá nyoka wakala wavanshema Ndamoni kwali Shatwani ávaduwanga vanu mushilambo uti. Nae pamo na vanjelo vake vandijalegwa mushilambo shapai.

¹⁰Napane ndígwa kuwa ko lidi lyadimongo liishidoni, “Ambi apa kwambolegwa kundiwika, dimongo na utawala wa Nnungu wetu na madalaka amwe Klistu wake mwaa andijalegwa pai aijá nkúkashali wavanung'unumunu ávakashali shilo na mui pamevo pa Nnungu wetu.

¹¹Vanavo vanintema kwamwaa wamyadi vya Ngandolo na kwalilove lyaushuda wave mwaa vanavo havanagwaladídye shingumi shave pakulota vanapele.

¹²Napavedoni, kuwa ko puwanga pamo na mwenu múnama ako! Shipambale shilambo na imanga, Ndamoni aninshulukila mwenu na andishimwa poe namene; nae andimanya kenga wakati wake wo, ubakidile padyoko.”

¹³Napanelo lijoka jo pamanyite kenga andijalegwa pai, andítunduvanga kummingilidya aijá nkongwe ámmaleke mwana nnume.

¹⁴Nkongwe vandímupa dimapa mbili dyashipungu nkumene kwambangidya auluke akawike mpaka kulyutu lyavampanganiangididye akulá kushimbweshe, lyutu lyalota kwikala vannisha mwaka, vyaka vivili na nushu mwaka[18] àvele kushu na aijá nyoka.

¹⁵Napanelo nyoka aijá nkanywa mwake andítapika medi kenga lundi kupita lumwoda nkongwe kwambangidya lupite lunjola na dimongo.

¹⁶Kanji shilambo shapai shinímpwashela nkongwe jo, shindíjama kenga ikanywa kutwala kumila lundi lwatapike lijoka nkanywa mwake.

¹⁷Bai lijoka jo anínshimwidya nkongwe aijá akalinyemya kuka ndavatenda ing'ondo udukulu ubakidíle wankongwe yani avalá vaigwilíla malamulo a Nnungu na vakamulidíle ushuda wake Yesu.

¹⁸Nadoni lijoka andíimila mudimbwe dyananyenje imanga.[19]