Read Ibibiliya mu Shimakonde Imbodi Yaambi na dimbande dya Imbodi Yakala Maono 14 Bible Online

Maono 14 - Ibibiliya mu Shimakonde Imbodi Yaambi na dimbande dya Imbodi Yakala bible

Maono 14

¹Mwe! Ndikalole, ndímwona Ngandolo àimidile palishinga lya Shiyau pamo na vanu imiya imo alubaini na nsheshe alupu vaandikígwe pavyenye vyave lina lya Ngandolo na lya Tatamunu.

²Namomo kuwa ko lindíigwinika lidi lyakuva kenga libubu lyamedi na kenga lyaing'uva yadimongo. Madi alo ashiigwinika kenga avakwomba-kanyembe pavavomba vakanyembe

³vaimba lwimu lwaambi po pashiteng'u po pamevo paviumbi nsheshe na pa avalá vanang'olo. Lwimu alwo hapali hashulula kulipundisha ila avalá imiya imo alubaini na nsheshe alupu vashumigwídye mushilambo.

⁴Ava ni vanu vákalidabuwenge mwavakongwe mwaa vandilishunga mushingumi shave uti. Vanavo vankumwoda Ngandolo kwoekwoe kwauka. Vovo vo, vandishumigwa pakati pavanu kwambangidya vave shadaka shitandi shakumuumidya Nnungu na Ngandolo.

⁵Nkanywa mwave, hamushuma kushang'apa; vavele vanu vákave makosha.

⁶Napanelo ndímwona njelo junji auluka kuniania àvenavo ntenga wambone úkamalilika pakulota avavalangangile avalá vanáma mushilambo shapai; kula shilambo, likola, inangodi na venentete

⁷atangola pashanya po aashidoni, “Njope Nnungu na tumbyanga lishangelo lyake mwaa undiwika wakati waukumu. Namomo lipudye kumwe aijá ákandyenge kuwa, pai, imanga na mwadipandukenge dyundi.”

⁸Njelo wambili andímwatika aashidoni, “Andipandamoka! Andipandamoka Babiloni nkumene átadidye venentete uti vakumbile vinyu vyashitundi vyakulavalava kwake.”

⁹Njelo wantatu andívaatika avalá vatandi átangola pashanya po aashidoni, “Ikava kenga munu andalipudya kwa aijá lidimu, lishinamu lyake na kuvikigwa numalu pashenye kwali munkono,

¹⁰namomo andakumbila vinyu vyakushimwa kwake Nnungu vyavamiminidile muluwene lwashitundi shake bila kudimulanga. Leka apo, jojo jo andauvauvanga moto na ipataki pamevo pavanjelo vakwilimyanga na pamevo pa Ngandolo;

¹¹lyoi livauvyauvyánga vanu avo, lindakwela ngwengwe ngwengwe. Koko ko, shilo na mui halipagwa shinu litala lyakupumula avalá valipúdya kumwe lidimu pamo na lishinamu lyake, namomo uti avalá vavikígwe numalu walina lyake.”

¹²Apa ni patakígwa kunanopa kwavakwilimyanga, vashúnga malamulo ake Nnungu na likulupililo lyave nkati mumwe Yesu.

¹³Napanelo kuwa ko lindíigwinika lidi liishidoni, “Andika! Vandyalaligwa avalá valóta kupela nkati mumwe UMU kutunduvangila ambi apa kuka mushu.” Imumu ankushidoni, “Elo, vanavo vandapumula shimadengo shave shadimongo mwaa vyepo vyashimadengo shave, vindavoda.”

¹⁴Mwe! Ndikalole, mushu mwangu ndyóna lyundi lyanashwe, pashanya lyundi po andíikala ávele kenga Mwana Wamunu àgwete lidaka lyashaabu mmuti, mmakono mwake ànyukete mundu wakukola.

¹⁵Napane mwing'ande ya Nnungu kuma njelo junji kutwala kutangola lidi likumene amwaulila aijá áikele pashanya lyundi kushidoni, “Twala mundu wako utunduvange kupuna kwoda wakati wakupuna undiwika mwaa mushilambo amu, vilyo vinditandeka.”

¹⁶Nadoni aijá áikele pashanya lyundi andínyaladyedya mundu wake mushilambo kutwala vilyo, kupunigwa.

¹⁷Njelo junji andyúma mwing'ande ya Nnungu ivéle kuwa nanae momo àvenavo mundu wakukola.

¹⁸Namomo kulutali ko andyúma njelo junji áshaangaikangila moto wa apo kutwala kutangola lidi likumene amwaulila aijá wamundu wakukola kushidoni, “Twala mundu wako wakukola wo ukalumulange mapamala auva amushilambo, ukushanie mwaa vyepo vyake vindyula.”

¹⁹Napanelo aijá njelo andínyaladyedya mundu mushilambo, kukushania mapamala auva alalá kutwala kujela mulitangi likumene lyashitundi shake Nnungu;

²⁰uva aulá vandíkandangila mulitangi[21] livéle panda njini kutwala mo mulitangi kuma myadi nanshulumbwidi vyakuwikila ulinga kenga wang'ombe, vingalwéle maili dimiya nnatu.