Read Ibibiliya mu Shimakonde Imbodi Yaambi na dimbande dya Imbodi Yakala Maono 16 Bible Online

Maono 16 - Ibibiliya mu Shimakonde Imbodi Yaambi na dimbande dya Imbodi Yakala bible

Maono 16

¹Napanelo kuwa ko kwigwa lidi likumene lyalakela mwing'ande yake Nnungu livaulila avalá vanjelo saba kushidoni, “Wena mukamiminile shilambo midamu saba vyashitundi shake Nnungu.”

²Njelo ntandi andyúma kutwala kumiminila ndamu wake mushilambo, avalá uti vavénavo numalu umwe lidimu na kulipudya kulishinamu lyake, vandíbabukanga makana akujowa.

³Njelo wambili andimiminila ndamu wake mwimanga kutwala yanavo kujalukanga kuva kenga myadi vyamunu wakupela na vinu uti vivénavo shingumi vipagwíte mwimanga, kuwanga.

⁴Njelo wantatu andimiminila ndamu wake mudyundi na myuto uti kutwala kujalukanga kuva myadi.

⁵Napanelo ndímwigwa njelo áshaangaikangila medi aashidoni, “Wako ni waishaliya; wako Wakwilimyanga gwegwe úpagwite, we upagwíte, mwaa vinu avi uti undyukumu.

⁶Mwaa vanavo vandijaa myadi vyavakwilimyanga pamo na vyavakulava, wako undivapa myadi vakumbile; amo ni muvavaikidíle.”

⁷Napane ndígwa alutali luushidoni, “Elo UMU Nnungu Wadimongo-uti, ukumu yako ni yaumwiu na yaishaliya.”

⁸Njelo wansheshe andimiminila ndamu wake paliduva kutwala liduva lyo kupata lyululilo lyakupiya namene.

⁹Vanu avo vandípya namene liduva; ata ive davo vanavo vandíkupulu lina lya Nnungu mwene lyululilo lyavyaushanga avyo na ata havalijugulénge na havampéle lishangelo Nnungu.

¹⁰Njelo wamwanu andímiminila ndamu wake pashiteng'u sha aijá lidimu kutwala muutawala wake kwinjila shii. Kwamwaa wakupwateka, kula munu ashindamamena lulimi lwake,

¹¹vashinankupulu Nnungu wakuwa kwamwaa wakupwateka na wamakana ave; ata ive davo, havalijugulénge vitendo vyave.

¹²Napane njelo wasita andímiminila ndamu mulundi lukumene lwa Eupalati kutwala medi alundi alwo, kupwalela kwambangidya vapanganiange indila ya avalá vaumu vakwalakela kwalyaloka liduva.

¹³Bai níndyona nkanywa mwalijoka, mwalidimu na mwankúlava wakushang'apa auma majini mashapu matatu akulandana na vitogwa.

¹⁴Adyo ni dimumu dyamajini ditenda vimanyikilo. Vovo vo vankuvaukila vaumu vammilambo uti kutwala kuvakumbulila pamo kwambangidya vatende ing'ondo muliduva likumene limwe Nnungu Wadimongo-uti.

¹⁵“Lola, ninkwida kenga ninkwíva! Andyalaligwa aijá álilaledya na ákondya dinguvo dyake kwambangidya hanawene matakudavo na kutaa dyoni paumbala.”

¹⁶Napanelo dimumu nnatu dyamajini adilá dindívakumbulila pamo vaumu palyutu lyavashema mushibalaniya Alimagedoni.

¹⁷Njelo wasaba andímimina ndamu kuniania kutwala kwigwinika lidi likumene líshaalakela pashiteng'u mwing'ande ya Nnungu liishidoni, “Tayali indiwikila popo!”

¹⁸Bai kundyúmilila kumeta, shilindimu, ding'uva na shindangenda shikumene; shindangenda shakujowa shíkanava kuumilila tangu kukandyangigwa munu mushilambo shapai.

¹⁹Njini ukumene aulá undíjavanika disemu nnatu, navyanavo minjini vyavenentete vindíbamalegwa. Nnungu andíkumbukila njini ukumene wa Babiloni kutwala kwing'a shikombe shavinyu shakushimwa kwake.

²⁰Vitingi vyammedi uti vindílambaleka na mashinga andígwalagwala.

²¹Kuwa ko, indívatanyela vanu imbula yadinyanga ding'umene, kula inyanga ishindaidopa dikilo kenga salasini na tano doni, vanavo vanínkupulu Nnungu kwamwaa waimbula ayo mwaa mauvilo lo, andímamodya.