Read Ibibiliya mu Shimakonde Imbodi Yaambi na dimbande dya Imbodi Yakala Maono 19 Bible Online

Maono 19 - Ibibiliya mu Shimakonde Imbodi Yaambi na dimbande dya Imbodi Yakala bible

Maono 19

¹Vikapite vinu avyo, ndígwa kuwa shinu kenga lidi likumene lyadimbumba liishidoni, “Aleluya! Kwambwalegwa, lishangelo pamo na dimongo, dyake mwene Nnungu wetu,

²mwaa ukumu yake ni yaumwiu na yaishaliya. Nae andimuukumu lilaja nkumene áshitindinganianga shilambo kwakulauka kwake. Aninnipilila kwamyadi vyavatumika vake vyajaile nae kwamakono ake.”

³Kutwala kavili dimbumba kushidoni, “Aleluya! Lyoi lyakwalakela njini awo, lindakwela ngwengwe ngwengwe.”

⁴Napanelo avalá vanang'olo ishilini na nsheshe pamo na avilá viumbi nsheshe, vandíguguvala mpaka vyenye kundondya pai valipudya kwa Nnungu áikele pashiteng'u vaashidoni, “Ame, Aleluya!”

⁵Napane pashiteng'u po lindíigwinika lidi lishishidoni, “Ntumbyange Nnungu wetu, mwenu uti mmatumika vake, mwenu múnjopa, kutunduvangila ndyoko na nkulu!”

⁶Namomo ndígwa lidi lyakuva kenga lyadimbumba dyavanu, lyakuva kenga libububu na lyakuva kenga shilindimu shading'uva liishidoni, “Aleluya! Mwaa UMU Nnungu wetu Wadimongo-uti, ankutawala.

⁷Tuke tupuwange! Tulitamange, tumupe lishangelo! Mwaa undiwika wakati washitamo shimwe Ngandolo, nkúlombwa andilipanganianga tayali.

⁸Vandimupa agwale inguvo yakunamikanga, yakumalameta na yakutakata.” Inguvo yakunamikanga yo ni matendo aishaliya avakwilimyanga.

⁹Njelo kutwala kungwaulila doni, “Andika: Vandyalaligwa avalá valalikígwe kupagwa pandamu washitamo shimwe Ngandolo!” Kavili kungwaulila kushidoni, “Ala ni malove aumwiu ake Nnungu.”

¹⁰Napanelo ndígwilangila mmadodo mwake pakulota ngulipudye kwake kanji nae kushidoni, “Haunatende davo! Nangu ni ntumika kenga wako na kenga vanung'unumunu vavénavo likulupililo muushuda wake Yesu. Lipudye kumwe Nnungu! Mwaa ushuda ummalangánga Yesu ni imumu yakulava.”

¹¹Bai nindyóna kuwa kushimwike, mwe! Napane ndímwona punda wanashwe, aijá ánkwadile punda vashinshema Wakukulupilika na Waumwiu. Nae ankuukumu na kutenda ing'ondo kwaishaliya.

¹²Mevo ake kuva kenga lilamba lyamoto na mmuti kupagwa madaka oe pamo na lina lyamanyite jo mwene, munu junji mene.

¹³Jojo jo andígwala ikanju yavashuvike myadi kutwala lina lyake kuva Lilove lya Nnungu.

¹⁴Vashindamwoda vaing'ondo vakuwa vàvakwalenge vapunda vanashwe, vàgwalenge dinguvo dyakunamikanga dyanashwe na dyakutakata.

¹⁵Nkanywa mwake mundyúma lyambila lyakukola pakulota avabyaile venentete, jojo jo andavalangalalela na ipimbo yashitali na andakandangila vinyu mulitangi lyakushimwa kwake Nnungu Wadimongo-uti.

¹⁶Mwikanju yake na nshija mwake vandyandika lina ali, “Umu wavaumu, Nang'olo wavanang'olo.”

¹⁷Napanelo ndímwona njelo jumo àimidile paliduva atangola pashanya po avaulila vyuni vyulukánga kuniania doni, “Idananga muumbalanile pashikukulu shikumene shake Nnungu

¹⁸pakulota mulye dinyama dyavaumu, dyavanang'olo vavaing'ondo, dyavanu vadimongo, dyavapunda pamo na dyavakuvatukusha vave, dyavanu uti: vamuunaiti na vamuutumwa, vadyoko na dyavanang'olo.”

¹⁹Napanelo ndímwona lidimu, vaumu vamushilambo pamo na vaing'ondo vave vàkadyanienge pakulota kuntenda ing'ondo aijá ánkwadile punda pamo na vaing'ondo vake.

²⁰Kanji lidimu aijá, vanínkamula pamo namu nkúlava wakushang'apa áshitenda vimanyikilo palina lyake avaduwanga vanu vapwashaladíle numalu umwe aijá lidimu na kulipudya kulishinamu lyake. Uti ava vavili vandíjalegwa mulitanda lyamoto likaléla na ipataki vàvele vangumi.

²¹Vanji uti vandíbyaigwa na lyambila limwe aijá ánkwadile punda, lyambila lyolyo lyumíle nkanywa mwake. Bai malembo uti vindívakamila vitumbo kwamwaa wadinyama dyave.