Read Ibibiliya mu Shimakonde Imbodi Yaambi na dimbande dya Imbodi Yakala Maono 2 Bible Online

Maono 2 - Ibibiliya mu Shimakonde Imbodi Yaambi na dimbande dya Imbodi Yakala bible

Maono 2

¹“Njelo waliganisha lya ku Epeshu mwandikile, ‘Ala ni malove amwe aijá ányukete dinondo saba munkanakono wake na jojo jo, ankuwena shing'ati ditaa saba dyashaabu,

²“ ‘Nangu ndimanya vitendo vyako, kulyuvyauvyanga kwako, kunanopa kwako na haunavapambedya shinu avalá vatandédya vyakunyata; namomo undivatenda nningo valivíka kuva vamyombe kumbe vákavele kutwala kuvaanalela kuva vakushang'apa.

³Wako unkunanopa na unkulipililila mauvilo kwamwaa walina lyangu na haudabadabenge.

⁴Ila napane shipali shikunyatyánga; wako undileka linagwaledyo lyako litandi.

⁵Kumbukila pashi paugwile. Lijugulange na tandedya vitendo vyako vitandi. Ukanalijugulanga, ninkukwidila ndausha itaa yako palyutu lyake.

⁶Kanji pane shipali shalala kwako wako, wako unkuvangedya vitendo vyavanikolau kenga mo mwanguvangadyedya nangu.

⁷“ ‘Ávenavo matu, aigwe vyatangola Imumu na maganisha. Nkútema, andapata aki yakulya shepo shannandi washingumi uvéle kwa Nnungu lyutu lyalipuwilo.’ ”

⁸“Njelo waliganisha lya ku Eshimilina mwandikile, ‘Ala ni malove amwe aijá Nantandi na Wamwisho, e apadíle kutwala kunama:

⁹“ ‘Nangu ndimanya mauvilo ako na ungave-pashinu wako kanji wako po, untajili. Namomo mwavamwabalangila mwenu avalá valivíka kuva vayuda vakavele, kumbe ni shitala shakulipudidya shimwe Shatwani.

¹⁰Vyaulota kuvauvanga vyo, haunajope. Igwa, pakati penu Ndamoni andavajela vanji nkalaboshi pakulota mulingigwe na mundauvauvanga maduva kumi. Kulupilika mpaka kupela nangu ndakupa lidaka lyashingumi.

¹¹“ ‘Ávenavo matu, aigwe vyatangola Imumu na maganisha. Nkútema, mwiko hashintandeka shinu mukupela kwambili.’ ”

¹²“Njelo waliganisha lya ku Peligamu mwandikile, ‘Ala ni malove amwe aijá ávenavo lyambila lyakukola kuvili:

¹³“ ‘Ndimanya doni, paunama po ni pashiteng'u shimwe Shatwani. Ata ive davo mpaka ambi unkunamatila lina lyangu na haukanile likulupililo lyako kwangu, ata muwakati umwe Antipashi nshuda wangu wakukulupilika wavamyaile pakati penu, po panama Shatwani po.

¹⁴Ila vipali vinu padyoko vikunyatyánga wako, ako vapali vaodedya mapundisho ake Balaau, aijá ámpundishidye Balaki kuvateja lutambo vanaishilaeli pakulota valye vyakulya vyavashivaumidya vannungu vakushang'apa na valavalave;

¹⁵na yadavo vapali pakati pako vanu vaodedya mapundisho avanikolau.

¹⁶Napavedoni lijugulange! Ukanalijugulanga ndakwidila shipajelo ndavatenda ing'ondo vanu avo na alilá lyambila lyuma nkanywa mwangu.

¹⁷“ ‘Ávenavo matu, aigwe vyatangola Imumu na maganisha. Nkútema ndamupa alye manaa apiíke na ndamupa lijanga lyanashwe lyavandike lina lyaambi, lina alyo hapali ámanyite ila jo mwene ápwashalela.’ ”

¹⁸“Njelo waliganisha lya ku Tiyatila mwandikile, ‘Ala ni malove atangola Mwana wa Nnungu ávenavo mevo kenga lilamba lyamoto na madodo ake kenga lyava lyavataile nshasha:

¹⁹“ ‘Nangu ndimanya matendo ako na linagwaledyo lyako pamo na likulupililo lyako, kutumika kwako na kunanopa kwako, ndimanya kenga matendo ako ankupunda akunantandi.

²⁰Ila napane shipali shikunyatyánga, wako unkumpambedya Yeshebeli nkongwe álivika kuva nkúlava. Kwamapundisho ake, nae ankuvaashedya vatumika vangu mukulavalava na mukulya vyakulya vyavavaumididye vannungu vakushang'apa.

²¹Nangu nimupa wakati wakulota alijugulange kulavalava kwake kanji nae hatamwa.

²²“ ‘Napavedoni nantaa shilwele na ndavataa mauvilo akumamodya uti avalá valavaléve namu nae ikava kenga havalijugulanga vitendo vyake.

²³Ndavamalidya vana vankongwe aju. Nadoni maganisha uti andamanya do, nangu ni nalalyanga ntima pamo na makumbukililo, namomo nannipa mwenu kwodana na matendo enu.

²⁴“ ‘Kanji mwenu mmanji mma ku Tiyatila múkaodedya mapundisho alo na múkalipundishidye avilá vyavashema vipii vimwe Shatwani, ninkummanyiya doni, hanintika shinu ibasha inji;

²⁵ila ashilá shamuvenavo, kamulila na dimongo mpaka nangu pangulota kwida.

²⁶“ ‘Nkútema na átandedya uti mwangulatela nangu mpaka kumwisho ndamupa madalaka akuvatawalila venentete:

²⁷Nae andavalangalalela na ipimbo yashitali na andavapwajanga kenga vilongo;[11]

²⁸ni madalaka lolo angupatile kumwe Atata. Namomo ndamupa lyalosho.

²⁹“ ‘Ávenavo matu, aigwe vyatangola Imumu na maganisha.’ ”