Read Ibibiliya mu Shimakonde Imbodi Yaambi na dimbande dya Imbodi Yakala Maono 20 Bible Online

Maono 20 - Ibibiliya mu Shimakonde Imbodi Yaambi na dimbande dya Imbodi Yakala bible

Maono 20

¹Napanelo kuwa ko ndímwona njelo ashuluka, mmakono mwake ànyukete mungulilo wa ku Litavaleva na mang'unyang'unya makumene.

²Nae anínkamula lijoka, aijá nyoka wakala àvele Ndamoni kwali Shatwani kutwala kumunga vyaka alupu imo;

³kunjela ku Litavaleva kushima kutwala kukamela pashanya pake kwambangidya hanavaduwange kavili venentete mpaka viwike vyaka alupu imo. Ling'oto lya apo, inimmaikila aunguligwe wakati padyoko.

⁴Napanelo níndyona viteng'u vàikalenge avalá ve vavapéle madalaka akuukumu. Namomo kwona ungumi wa avalá vashindígwe kwamwaa waushuda umwe Yesu na walilove lya Nnungu. Vanavo havalipudídye kwalidimu na ata kulishinamu lyake, havakubalídye kuvikigwa numalu pashenye kwali munkono. Vovo vo, vandyújila kunama kutwala kutawala namu Klistu vyaka alupu imo.

⁵Vakupela vanji uti havaujidíle kavili mushingumi mpaka viwike vyaka alupu imo. Aku ni kudyuka kutandi.

⁶Wakwalaligwa na wakwilimyanga ni aijá álota kupagwa mukudyuka kutandi! Kupela kwambili hakuve madalaka kwavanavo; vovo vo vandava vakulangalalela-shadaka vamwe Nnungu na vamwe Klistu, vandatawala namu nae vyaka alupu imo.

⁷Pavilota kumalilika avilá vyaka alupu imo, Shatwani andaunguligwa mushipungu shake

⁸na andauma kupita avaduwanga venentete vavéle mmatununa nsheshe ashilambo shapai, yani Gogi na Magogi kwambangidya avakumbulile kwing'ondo. Ishabu yave ni kenga dimbwe dyamwimanga.

⁹Venentete vandíwena mudibondi uti dyamushilambo kutwala kutang'anedya ikambi yavakwilimyanga, njini wakunagwaleka. Kanji kuwa ko undíshuluka moto kwida ndavalya.

¹⁰Ndamoni áshivaduwanga, vaninjela mulitanda lyamoto likaléla na ipataki mo mwavele lidimu pamo namu nkúlava wakushang'apa. Amo vanavo vandapata mauvilo ngwengwe ngwengwe shilo na mui.

¹¹Napanelo níndyona shiteng'u shikumene shanashwe mwene shiteng'u jo àikalidile; pai na kuwa vínditila pamevo pake na halipagwíte lyutu lyavinu avyo.

¹²Namomo ndívona vapadíle vadyoko na vanang'olo vàimilenge mushu shiteng'u, popo po mabuku andyúnguligwa. Lindyúnguligwa libuku linji, yani lyashingumi. Vapadíle vo vandyúkumigwa kulingana na avilá vyandikígwe mmabuku kula munu na vitendo vyake.

¹³Imanga indívajaula vakupela vapagwíte amo, Kupela na Kumoka kuvajaula vakupela vapagwíte kwanavo, uti avo vandyúkumigwa kula munu kulingana na vitendo vyake.

¹⁴Bai Kupela na Kumoka vandíjalegwa mulitanda lyamoto. Litanda lyamoto lyo, aku ni kupela kwambili.

¹⁵Napane aijá líkaaneke lina lyake mulibuku lyashingumi, andíjalegwa mulitanda lyamoto.