Read Ibibiliya mu Shimakonde Imbodi Yaambi na dimbande dya Imbodi Yakala Maono 21 Bible Online

Maono 21 - Ibibiliya mu Shimakonde Imbodi Yaambi na dimbande dya Imbodi Yakala bible

Maono 21

¹Napanelo níndyona kuwa kwaambi na shilambo shapai shaambi. Mwaa kuwa kwakala, shilambo shapai shakala vindípita na imanga haipagwíte kavili.

²Namomo ndyóna njini wakwilimyanga Yelusalemu yaambi ishuluka kuwa kwa Nnungu kenga nkúlombwa wavampanganiyenge na kunnemya shana auka kwantwagwe.

³Napanelo ndígwa lidi likumene lyakwalakela pashiteng'u liishidoni, “Mwe! Ambi apa yema[24] ya Nnungu inkupagwa na vanu na nae andanama na vanavo. Vanavo vandava venentete vake; jo mwene Nnungu ápagwa na vanavo, andava Nnungu wave.

⁴Nae andavapukutanga myodi uti kumevo kwave; kupela, shipalodi, shililo, kupwateka hakupagwa kavili mwaa vinu vyakala uti, vindipita.”

⁵Napanelo aijá e aikéle pashiteng'u kutwala kushidoni, “Vinu uti ninkutenda kuva vyaambi.” Kavili kushidoni, “Andika mwaa malove ala ni akukulupilika na aumwiu.”

⁶Aníngwaulila kavili doni, “Vindiwikila popo. Nangu ni Alupa na Omega, Nantandi na Wamwisho. Ávenavo inyota ndamupa akumbile monyo papandukenge medi ashingumi.

⁷Nkútema andapata maleko avinu avi, nangu ndava Nnungu wake na nae kuva mwanangu.

⁸Kanji vakujopa, vákakulupila, vakalau, vakubyaa, vakulavalava, vavi, valipúdya kwavannungu na vakushang'apa uti, vanavo maleko ave, lilota kuva alilá litanda lyamoto likaléla na ipataki; aku ni kupela kwambili.”

⁹Njelo jumo pakati pavanjelo saba vavénavo midamu vyakuumbala avilá vyaushanga saba vyamwisho, anínguvandika kutwa kushidoni, “Ida, nangu ndakulodya nkúlombwa ndya Ngandolo.”

¹⁰Nae aníngutwala mu Imumu kunguukanavo kulishinga likumene lyakulepa kutwala kungulodya Yelusalemu njini wakwilimyanga úshaalakela kuwa kumwe Nnungu;

¹¹wanavo ushindashenga kwalishangelo lyake Nnungu, kushenga kwake kuvele kenga limashi kenga lijanga lyalinjano lyakung'ala namene.

¹²Wowo wo, undívanavo lishiti lyalingongo likumene na lyakulepa livénavo milango kumi na mbili; kula nnango andípagwa njelo jumo. Kula nnango vandyándika lina pakati pamena amakola kumi na mbili avanaishilaeli.

¹³Kwalyalakela liduva vindípagwa milango mitatu, kushanya shilambo kupagwa milango mitatu, kwina shilambo kupagwa milango mitatu na kwalyenda liduva kupagwa milango mitatu.

¹⁴Lishiti lyalingongo lyanjini awo, vadangile pashanya majanga kumi na mbili; namomo pashanya pakula lijanga, vandyándika lina limo pakati pamena a avalá vamyombe kumi na mbili vamwe Ngandolo.

¹⁵Njelo áshitangola namu nangu aijá, andívanavo nnandi washipimo wavakandyenge na shaabu pakulota apime njini, milango vyake pamo na lishiti.

¹⁶Njini awo muleu na mugwipi mundílinganana. Nae andípima njini na nnandi aulá kutwala kuma dikilometu dyalupu mbili na dimiya mbili; muleu, mugwipi na mwakuka muwa, mundílinganana.

¹⁷Nae andípima lishiti alilá kutwala kuma dimatulu sitini na tano kwodana na shipimo shavatumila vanu she shatumidíle njelo.

¹⁸Lishiti alyo vadangile na majanga amanjano na njini uvele washaabu íkave ushapu ilinganéne na shilolo.

¹⁹Majanga avatunduvangidile kudangela lishiti lyanjini awo, vandínemya kwakula inamuna yamajanga alimashi. Shitunduvangilo shalijanga litandi vandínemya na lijanga lyalinjano, shambili kunemya na lyakibulu, shantatu kunemya na lyakalishodoniya, shansheshe kunemya na lyamamba,

²⁰shamwanu kunemya na lyashalidoniya, shasita kunemya na lyanauvi, shasaba kunemya na lyakilisholitu, shanane kunemya na lyabelilu, shatisa kunemya na lyatopashiu, shakumi kunemya na lyakilishopalashu, shakumi na moja kunemya na lyayashitu kutwala shakumi na mbili kunemya na lyanshambalau.

²¹Milango kumi na mbili avilá vivele vyuma vyabei yoe kumi na mbili, kula nnango vakandyenge kwashuma shimo bai. Ibalabala ing'umene yanjini awo, vakandyenge kwashaabu íkave ushapu kenga shilolo shakulangala.

²²Mo munjini mo hangugwéne ing'ande ya Nnungu mwaa ako, ing'ande ya Nnungu ni UMU Nnungu Wadimongo-uti pamo namu Ngandolo.

²³Njini awo haunalateka shinu liduva kwali mwedi pakulota kumulikila mwaa lishangelo lya Nnungu linkumulikila kutwala itaa yake kuva aijá Ngandolo.

²⁴Venentete vandawena mulilangadyo lyake, vaumu vamushilambo vandaidanavo lishangelo lyave.

²⁵Milango vyake, mui mwiko havashima mwaa shilo, hashipali.

²⁶Lishangelo na ishima yavenentete uti vamushilambo vandaidanavo munjini awo.

²⁷Mwanavo, mwiko shinu shishapu hashiinjila, ata munu átandedya vyakudabukanga kwali vyakushang'apa; ila vandainjila bai avalá vaandikígwe mena ave mulibuku lyashingumi limwe Ngandolo.