Read Ibibiliya mu Shimakonde Imbodi Yaambi na dimbande dya Imbodi Yakala Maono 22 Bible Online

Maono 22 - Ibibiliya mu Shimakonde Imbodi Yaambi na dimbande dya Imbodi Yakala bible

Maono 22

¹Napanelo njelo aníngulodya lundi lwamedi ashingumi kenga shilolo shakulangala, áshaaloka pashiteng'u shake Nnungu na sha Ngandolo,

²áshipita shing'ati ibalabala yanjini awo. Kula mwangu walundi alwo upali nnandi washingumi upunígwa myanda kumi na mbili, kula mwedi unkupa shepo shake. Mamba annandi awo, atumika kwakuvaponia venentete uti vamushilambo.

³Dilana munjini awo, hadipagwa. Shiteng'u sha Nnungu pamo na sha Ngandolo shindapagwa munjini na vatumika vake vanantumika,

⁴vandona ing'ope yake na lina lyake lindaandikigwa muvyenye vyave.

⁵Shilo hashipagwa kavili: vanavo lilangadyo lyadikalaboi kwali lyaliduva nkati mo, havapali mwaa UMU Nnungu andavalangadya; vovo vo, vandatawala ngwengwe ngwengwe.

⁶Ling'oto njelo aníngwaulila doni, “Malove ala akukulupilika na maiu. UMU, Nnungu wadimumu dyavakulava, anintumidya njelo wake kwambangidya avalodye vatumika vake vinu vilóta kutandeka muwakati wakuvandika.”

⁷“Lola ninkwida ambi popa! Andyalaligwa aijá átandedya malove amaono amulibuku ali.”

⁸Nangu Nshuwau ningugwene na kwigwa vinu avi. Ling'oto lyakwigwa na kwona, ndíguguvala mmadodo mwake aijá njelo áshingulodya vinu avyo ngulota ngulipudye kwake.

⁹Kutwala nae kushidoni, “Gwe! Haunatende davo! Nangu nintumika kenga wako pamo na vanung'unumunu vakulava na uti avalá vatandédya malove amulibuku ali. Lipudye kwa Nnungu.”

¹⁰Kutwala kavili kushidoni, “Haunapiyapiyange malove amaono amulibuku ali mwaa wakati undivandika.

¹¹Átenda vyakunyata auke mushu atenda vyakunyata; átenda vyaushapu auke mushu atenda vyaushapu; átenda vyaishaliya auke mushu atenda vyaishaliya; wakwilimyanga auke mushu ailimyanga.”

¹²“Lola, ninkwida ambi popa! Dinudyo dyangu dyangwidanavo ndamupa kula munu kwodananavo shimadengo shake.

¹³Nangu ni Alupa na Omega, Nantandi na Wamwisho, Nkútunduvanga na Nkúmalilila.”

¹⁴Vandyalaligwa avalá vashápa dikanju dyave; nadoni vanavo vandavanavo aki yannandi washingumi na yakwinjilila njini vapitila mumilango vyake.

¹⁵Vandaikala panda vang'avanga, vavi, vakulavalava, vakubyaa, valipúdya kwavannungu pamo namu avalá vanagwalédya na vatandédya vyakushang'apa.

¹⁶“Nangu Yesu nintumidya njelo wangu aide aumye ushuda wavinu avi kwenu mwenu mmaganisha. Nangu ni Ntipu na Udukulu umwe Daudi, Inondo Yalyalosho ing'ála.”

¹⁷Imumu pamo na nkúlombwa vankushidoni, “Ida!” Kula áigwa aashidoni, “Ida!” Aijá ávenavo inyota, aide; aijá álota, atwale medi ashingumi akumbile monyo.

¹⁸Ninkumya ushuda kwa avalá uti vaígwa malove amaono alibuku ali: ikava kenga munu anaanjadyedya, Nnungu anamwanjadyedya avilá vyaushanga vyandikígwe mulibuku ali.

¹⁹Namomo ikava kenga munu andapungula malove avéle mulibuku ali lyamaono, Nnungu andapungula isemu yake yannandi washingumi na isemu yanjini wakwilimyanga yavaandike mulibuku ali.

²⁰Aijá áumya ushuda wavinu avi ankushidoni, “Elo ninkwida ambi popa.” Ame. Ida UMU Yesu!

²¹Umonyo umwe UMU Yesu upagwe na mwenu uti. Ame.