Read Ibibiliya mu Shimakonde Imbodi Yaambi na dimbande dya Imbodi Yakala Maono 3 Bible Online

Maono 3 - Ibibiliya mu Shimakonde Imbodi Yaambi na dimbande dya Imbodi Yakala bible

Maono 3

¹“Njelo waliganisha lya ku Shalideshi mwandikile, ‘Ala ni malove amwe aijá ávenavo dimumu saba dya Nnungu na dinondo saba: “ ‘Ndimanya vitendo vyako, wako unkuvanavo shimbili shakuva umumi, kumbe undipela.

²Ava mevo! Nonowanga avilá vibakidíle mushingumi vikanava kupalela uti mwaa muvitendo vyako mo, ndilola hashipali shilinganéne pamevo pa Nnungu wangu.

³Kumbukila avilá vyaupatile na vyawigwite, tandedya na lijugulange. Napane ikava kenga hauva mevo, bai ndakwidila kenga nkwíva, wako haumanya isaa yangulota kukwidila.

⁴Ata ive davo ko ku Shalideshi ko, unkuvanavo vanji padyoko vákanyatyenge dinguvo dyave. Vovo vo, vandawena namu nangu vàgwalenge dinguvo dyave dyanashwe mwaa vandivaikila.

⁵“ ‘Mumo momo nkútema vanangwadya inguvo yanashwe. Mwiko hanimputa lina lyake mulibuku lyashingumi ila nammalanganga pamevo pamwe Atata na pavanjelo vake.

⁶“ ‘Ávenavo matu, aigwe vyatangola Imumu na maganisha.’ ”

⁷“Njelo waliganisha lya ku Piladelipiya mwandikile, ‘Ala ni malove amwe aijá Wakwilimyanga na Waumwiu, ávenavo myungulilo vimwe Daudi. Shaungula nae, hapali wakunga na shaungile nae, hapali wakuungula:

⁸“ ‘Nangu ndimanya vitendo vyako. Lola, mushu mwako ndishimula nnango wakaulula munu kushima. Ndikumanya do, ata ikava kenga unkuvanavo dimongo padyoko, undishunga lilove lyangu na hawitile lina lyangu.

⁹Laledya shangulota kuvatenda avalá vamushitala shakulipudidya shimwe Shatwani, vo valivíka kuva vayuda kumbe vakavele vayuda vàvele vakushang'apa. Mwiu ndavatadya valipudye mmadodo mwako na vamanye do, nangu ndikunagwaledya.

¹⁰Pakuva wako undishunga malailililo amukunanopa kwamwaa wangu nangu, nanangu momo ndakushunga wakati wamalingo alóta kwida mushilambo uti pakulota kuvalinga vanu vanáma vamushilambo shapai.

¹¹Ninkwida shipajelo! Kamulila ashilá shauvenavo kwambangidya hanatwale munu lidaka lyako.

¹²“ ‘Nkútema nantenda kuva libodo lyaing'ande ya Nnungu wangu na mwiko hauma kavili. Ndamwandika lina lya Nnungu wangu na lina lyanjini wa Nnungu wangu yani Yelusalemu yaambi yalakéla kuwa kwa Nnungu wangu; namomo ndamwandika lina lyangu lyaambi.

¹³“ ‘Ávenavo matu, aigwe vyatangola Imumu na maganisha.’ ”

¹⁴“Njelo waliganisha lya ku Laudisheya mwandikile, ‘Avi atangola Ame, nshuda wakukulupilika na waumwiu, ntipu wa avilá vyakandyenge Nnungu:

¹⁵“Ndimanya vitendo vyako, wako haunadidima shinu na ata haunapiya shinu. Kudyanga paukavéle wakudidima kwali wakupiya;

¹⁶nadoni kwoda mwaa wako uve pakatipakati, haunadidima shinu na haunapiya shinu, bai nguve pepi-pepi na kukutapika.

¹⁷Wako uushidoni, ‘Nangu nintajili, nditajilika doni na hashipali shingwova.’ Kumbe haunalimanya shinu kenga wako wakuvauvanga, útaa shididi, úkave pashinu, wakuputala na úve matakudavo.

¹⁸Napavedoni ninkukulingula wide kwangu ushume vinu avi: shaabu ipitidíle pamoto pakulota uve utajili, dinguvo dyanashwe ugwale pakulota dyoni dyawou wako hadinaaneke na ntela upake mevo ako pakulota ulole.

¹⁹Nangu ndávaduma na kuvapa lipundisho uti avalá vandivanagwaledya. Napavedoni, avanavo ntukuta na lijugulange.

²⁰Lola, ndiimila pannango ninkundandonda lwidi. Ikava kenga munu anaigwa lidi lyangu na kushimula, mwiu nangu ndainjila nng'ande mwake na ndalyanavo pamo.

²¹“Nkútema ndamupa aki yakwikala namu nangu pashiteng'u pangu kenga nangu momo nditema na ndiikala namu Atata pashiteng'u pake.

²²“Ávenavo matu, aigwe vyatangola Imumu na maganisha.”