Read Ibibiliya mu Shimakonde Imbodi Yaambi na dimbande dya Imbodi Yakala Maono 4 Bible Online

Maono 4 - Ibibiliya mu Shimakonde Imbodi Yaambi na dimbande dya Imbodi Yakala bible

Maono 4

¹Vikapite vinu avi, ndilola kutwala kwona kuwa nnango ùshimwike. Namomo alilá lidi lyangwigwíte kunantandi litangola namu nangu kenga lipalapanda, lyolyo kutwala kushidoni, “Kwela wide apa, nangu ndakulodya vinu vilóta vitandeke ling'oto lya avi.”

²Muwakati wowo ndítwaligwa mu Imumu, kumbe kuwa ko shindípagwa shiteng'u, mwene shiteng'u àikalidile;

³aijá aikéle pashiteng'u apalá kwakunnola vila, avele wakung'ala kenga lijanga lyalinjano na lyanauvi. Namomo indípagwa yuvi íshing'ala mwalimashi ìtang'anadidye shiteng'u.

⁴Yo nanyenje shiteng'u yo, vindípagwa viteng'u ishilini na nsheshe; muviteng'u mo kwikala vanang'olo ishilini na nsheshe vàgwalenge dinguvo dyanashwe, myuti vyave vàgwalenge madaka ashaabu.

⁵Po pashiteng'u po, pankumeta na pankuma vilindimu vyading'uva. Mushu mwake, vinkukalela moto vyenje saba, vyenje avi ni dimumu saba dya Nnungu.

⁶Namomo mushu mwashiteng'u asho, shinkupagwa shinu mwaimanga yashilolo kenga lijanga lyakulangala. Nyenje mwake shiteng'u vinkupagwa viumbi nsheshe vyakuvaumbala mevo mushu na kunyuma.

⁷Shiumbi shitandi shinkuva kenga ntumi, shambili kuva kenga ng'ombe, shantatu ashi kuvanavo ing'ope kenga yamunu na shansheshe kuva mwashipungu áuluka.

⁸Viumbi nsheshe avyo kula shiumbi shinkuvanavo dimapa sita vàumbaligwidye mevo mumili uti mpaka nkati dimapa. Vanavo shilo na mui havanapumula shinu vaashidoni, “Wakwilimyanga, wakwilimyanga, wakwilimyanga ni UMU Nnungu Wadimongo-uti apagwíte, ápagwite na álota kwida.”[12]

⁹Napanelo viumbi avilá kula mwanda pavamupa lishangelo, ishima na kunnambwalela aijá áikele pashiteng'u, jojo ánama ngwengwe ngwengwe,

¹⁰vanang'olo ishilini na nsheshe avalá vandáguguvalanga mpaka vyenye kundondya pai pamevo pamwe aijá áikele pashiteng'u, valipudya kwa aijá ánama ngwengwe ngwengwe na vavika madaka ave mushu shiteng'u vaashidoni,

¹¹“Wako UMU, Nnungu wetu, undivaikila kupata lishangelo, ishima na dimongo mwaa wako undikandyanga vinu uti na kwalilotelo lyako vindikandyangigwa na vipali.”