Read Ibibiliya mu Shimakonde Imbodi Yaambi na dimbande dya Imbodi Yakala Maono 5 Bible Online

Maono 5 - Ibibiliya mu Shimakonde Imbodi Yaambi na dimbande dya Imbodi Yakala bible

Maono 5

¹Napanelo munkono wakunkanakono umwe aijá áikele pashiteng'u, ndyóna shidingo shavaandike nkati na panda vànamatidyenge dishelu saba.

²Namomo ndímwona njelo wadimongo alaililila na lidi likumene aashidoni, “Nyani ávaikidile kudingula shidingo na kunamatulanga dishelu?”

³Kanji hapagwíte ata munu jumo kuwa, mushilambo na pai wakuulula kudingula shidingo asho kulola shivé nkati mwake.

⁴Napane nangu ngushindalila namene kwamwaa me kupatikananga munu ávaikidile kudingula kutwa kulola nkati mushidingo asho.

⁵Kutwala jumo pakati pavanang'olo kungwaulila doni, “Haunalile! Lola, ntumi walikola limwe Yuda, ntipu umwe Daudi, nae anditema. Jojo jo, ankuulula kudingula shidingo sho na kunamatulanga dishelu dyake saba.”

⁶Ling'oto ndímwona Ngandolo áshaaneka kenga andibyaigwa àimidile shing'ati shiteng'u vàntang'anadidye viumbi nsheshe na avalá vanang'olo. Jojo jo, andívanavo dimembe saba na mevo saba, alo ankwitika kuva dimumu saba dya Nnungu dyatumididye mushilambo uti.

⁷Nae andyúka ndavandika kutwala shidingo ashilá shivéle munkono wakunkanakono umwe aijá áikele pashiteng'u.

⁸Akapwashalele, avilá viumbi nsheshe pamo namu avalá vanang'olo ishilini na nsheshe vandíguguvalanga mpaka vyenye kundondya pai mushu mwa Ngandolo. Kula munu pakati pave andívanavo kanyembe na midamu vyashaabu vyakuumbala lubani, vyanavo ni kushwali kwavakwilimyanga.

⁹Vanavo vashindaimba lwimu lwaambi vaashidoni, “Wako ni úvaikidile kutwala shidingo na kunamatulanga dishelu dyake mwaa undibyaigwa na kwamyadi vyako uninshumila Nnungu vanu vakula likola, inangodi, venentete na shilambo.

¹⁰Undivatenda kuva utawala na vakulangalalela-shadaka kwa Nnungu wetu; vanavo vandalangalalela mushilambo.”

¹¹Napanelo ndílola kutwala kwigwa lidi lyavanjelo voe, vipinga vyave vivele makumi manga vàtang'anadidye shiteng'u pamo na avilá viumbi, vanang'olo

¹²vaimba pashanya po vaashidoni, “Ávaikidile kupata dimongo na mali, limanyilo na lyululilo, ishima, lishangelo na litumbyangilidyo ni Ngandolo ábyaigwe.”

¹³Napanelo ndígwa kula shiumbi shivéle kuwa, mushilambo, pai, mwimanga na uti vipagwíte amo viishidoni, “Kwake aijá áikele pashiteng'u na kumwe Ngandolo, litumbyangilidyo na ishima, lishangelo na utawala vipagwe ngwengwe ngwengwe.”

¹⁴Avilá viumbi nsheshe kushidoni, “Ame.” Bai vanang'olo avalá vandíguguvala kutwala kulipudya kwake.