Read Ibibiliya mu Shimakonde Imbodi Yaambi na dimbande dya Imbodi Yakala Maono 8 Bible Online

Maono 8 - Ibibiliya mu Shimakonde Imbodi Yaambi na dimbande dya Imbodi Yakala bible

Maono 8

¹Napanelo Ngandolo panamatwile ishelu yasaba kuwa kundímalalika wakati kenga wanushu isaa.

²Napane ndívona vanjelo saba vàimilenge mushu mwake Nnungu na vavapa mapalapanda saba.

³Andíwika njelo junji apalá palutali ànyukete shombo shashaabu shavanatutumididya lubani, kwimila. Jojo jo, vandímupa lubani lwoe lwakulota kwanganianga na kushwali kwavakwilimyanga uti akaumye palutali lwashaabu luvéle mushu shiteng'u.

⁴Mmakono mwanjelo mundyúma lyoi lyalubani pamo na kushwali kwavakwilimyanga kuka kwa Nnungu.

⁵Napanelo aijá njelo andítwala shombo shalubani ashilá kuumbadya makala amoto apalutali kutwa kujela mushilambo shapai. Bai kundyúmilila ding'uva, shilindimu, kumeta na shindangenda.

⁶Napanelo avalá vanjelo saba ve vanyukéte mapalapanda saba vandílipanganianga pakulota kwomba mapalapanda.

⁷Njelo ntandi andyómba lipalapanda kutwala imbula yadinyanga na moto wanganikéne na myadi kujalegwa mushilambo. Imbandi yantatu yashilambo, imbandi yantatu yamilandi na uti udani umbii, vindítikinyuka.

⁸Njelo wambili andyómba lipalapanda kutwala shinu shakuva mwalishinga likumene likaléla moto kujalegwa mwimanga, imbandi yantatu yaimanga kujalukanga kuva myadi,

⁹imbandi yantatu yaviumbi vináma mwimanga vindípalanga na imbandi yantatu yadimeli indíbamalegwa.

¹⁰Njelo wantatu andyómba lipalapanda kutwala kuwa ko kumatuka inondo ing'umene kenga likamu lyamoto likaléla ndagwilila mwimbandi yantatu yadyundi na mwapandukanga medi:

¹¹lina lyainondo ayo vashishema, “Lipangapanga.” Bai imbandi yantatu yamedi indíjalukanga kuva akukalala na vanu voe vandípalanga kwamwaa wakukalala kwamedi alo.

¹²Njelo wansheshe andyómba lipalapanda kutwala kuligwa imbandi yantatu yaliduva, yamwedi, yadinondo na mpaka imbandi yantatu yavinu avyo indídimba. Imbandi yantatu yamui na yashilo momo, indídimba do pii!

¹³Akuno ngulola, níndigwa lidi lyashipungu áshuuluka kuniania apita atangola pashanya po aashidoni, “Vapambale, vapambale, vapambale vanu vanáma mushilambo shapai kwamwaa wamadi amapalapanda abakidíle avalota kwomba avalá vanjelo vatatu.”