Read Malagasy Joba 10 Bible Online

Joba 10 - Malagasy bible

Joba 10

¹Maharikoriko ahy ny aiko; Hamoaka ny fitarainako aho sy hiteny noho ny fangidian'ny fanahiko

²Hanao amin'Andriamanitra hoe aho: Aza manameloka ahy; Mba ampahalalao izay anton'ny iadianao amiko aho.

³Mahafaly Anao va ny hampahory sy hanary ny efa nisasaranao ka hamirapiratra amin'ny fisainan'ny ratsy fanahy?

⁴Manana maso nofo va Hianao? Na mijery tahaka ny fijerin'ny zanak'olombelona?

⁵Tahaka ny andron'ny zanak'olombelona va ny andronao? Na tahaka ny taonan'ny olombelona ny taonanao,

⁶No dia mikaroka izay heloko Hianao sy mikatsaka izay fahotako,

⁷Na dia fantatrao aza fa tsy mba ratsy fanahy aho, ary tsy misy mahavonjy amin'ny tananao?

⁸Ny tananao ihany no namorona ahy ka nanisy endrika izao tenako rehetra izao, kanjo levoninao indray aho izao.

⁹Masina Hianao, tsarovy fa notefenao toy ny tanimanga aho, ka hamerina ahy amin'ny vovoka indray Hianao!

¹⁰Tsy naidinao toy ny ronono va aho ka nampandrinao toy ny ronono-mandry?

¹¹Eny, notafianao hoditra sy nofo aho ary norarinao tamin'ny taolana sy ny ozatra.

¹²Aina sy famindram-po no nomenao ahy; Ary ny fiahianao no niaro ny aiko.

¹³Saingy izao no nafeninao tao am-ponao, eny, fantatro fa tao aminao izao:

¹⁴Raha manota aho, dia mamantatra ahy Hianao ka tsy manafaka ahy amin'ny heloko.

¹⁵Raha meloka aho, dia lozako! Ary na dia marina aza aho, dia tsy ho sahy miandrandra, satria feno henatra sady mahatsiaro fahoriana aho.

¹⁶Fa raha sahy miandrandra aho, dia hihaza ahy tahaka ny liona masiaka Hianao; Ary hiverina indray Hianao, ka ho mahagaga ny famelinao ahy.

¹⁷Mbola hanangana vavolombelona vaovao mandrakariva hanameloka ahy Hianao sy hampitombo ny fahatezeranao amiko; Fahavalo mifanontona no mamely ahy.

¹⁸Ka nahoana no namoaka ahy foana avy tany am-bohoka Hianao? Fa raha tsy izany, dia ho niala aina aho, ka tsy mba nisy maso nahita ahy akory.

¹⁹Ary efa toy ny tsy ary aho. Ka nentina avy tany an-kibo ho any am-pasana.

²⁰Tsy vitsy va ny androko? Koa mitsahara Hianao, mihataha mba hakako aina kely,

²¹Dieny tsy mbola lasa tsy hiverina aho, dia ho any amin'ny tanin'ny aizina sy ny aloky ny fahafatesana,

²²Ho any amin'ny tany maizim-pito, dia ny an'ny aloky ny fahafatesana sy ny fikorontanana, sady maizim-pito ny famirapiratana any.