Read Malagasy Joba 13 Bible Online

Joba 13 - Malagasy bible

Joba 13

¹Indro, izany rehetra izany efa hitan'ny masoko, ary efa ren'ny sofiko ka fantany.

²Izay fantatrareo dia mba fantatro koa; Tsy latsaka noho ianareo aho tsy akory.

³Kanefa raha izaho, dia ny Tsitoha no tiako hitenenana, ary Andriamanitra no iriko handaharan-teny.

⁴Fa ianareo kosa dia mpamoron-dainga; Dokotera tsy mahomby ianareo rehetra,

⁵Enga anie ka hangina mihitsy ianareo, dia ho fahendrenareo izany!

⁶Masìna ianareo, henoy ny anatro, ary tandremo izay alahatry ny molotro.

⁷Hanao teny tsy marina ho enti-manamarina an'Andriamanitra va ianareo? Hiteny fitaka ho Azy va ianareo?

⁸Hiangatra ho Azy va ianareo? Handaha-teny ho an'Andriamanitra va ianareo

⁹Ho tsara aminareo va, raha mandinika anareo Izy? Na ho azonareo fitahina hoatra ny famitaka zanak'olombelona va Izy?

¹⁰Hanameloka anareo mihitsy Izy, Raha miangatra mangingina ianareo.

¹¹Tsy hampahatahotra anareo va ny fahalehibiazany? Ary tsy hitsatoka aminareo va ny fahatahorana avy aminy?

¹²Ireo teny tononinareo ireo dia ohabolana lavenona foana, ary manda fotaka ihany ny mandanareo.

¹³Mangina, ka mialà amiko ianareo, mba hitenenako; Fa aoka hanjo ahy ihany izay hanjo ahy.

¹⁴Nahoana no hitondra ny nofoko amin'ny nifiko aho? Tsia, fa manao ny aiko tsy ho zavatra aho.

¹⁵Na dia hamono ahy aza Izy, mbola hanantena Azy ihany aho; Kanefa hanamarina ny lalako eo anatrehany aho.

¹⁶Ary izao no ho famonjena ahy: Ny mpihatsaravelatsihy tsy sahy mankeo anatrehany.

¹⁷Mihainoa dia mihainoa ny teniko, ary aoka ho ren'ny sofinareo ny filazàko.

¹⁸Indro, fa efa voatoriko ny adiko; Fantatro fa hanan-drariny aho.

¹⁹Iza no hahazo hifandahatra amiko? Fa raha izany, dia hangina aho ka hiala aina.

²⁰Izao zavatra roa loha izao ihany no aza mba atao amiko, dia tsy hiery Anao aho;

²¹Esory hanalavitra ahy ny tananao, ary aoka tsy hampahatsiravina ahy fampitahoranao.

²²Dia miantsoa, fa izaho hamaly; Na aoka hiteny aho, ka valio aho.

²³Firy ary ny heloko sy ny fahotako? Mba ampahalalao izay fiodinako sy fahotako aho.

²⁴Nahoana no manafina ny tavanao Hianao, ka manao ahy ho fahavalonao?

²⁵Moa izay ravin-kazo indaosin'ny rivotra avy va no ampitahorinao? Ary izay vodivary maina avy va no enjehinao?

²⁶Fa zava-mangidy no tendrenao hamely ahy, ka ampanodiavinao ahy, ny heloky ny fahatanorako;

²⁷Dia mampiditra ny tongotro eo amin'ny boloky hazo Hianao ary mitsikilo ny diako rehetra; Ny hodiavin'ny tongotro dia feranao.

²⁸Dia izaho ity izay mihalevona tahaka ny zavatra hanin'ny fositra, eny, tahaka ny fitafiana lanin'ny kalalao.