Read Malagasy Joba 15 Bible Online

Joba 15 - Malagasy bible

Joba 15

¹Dia namaly Elifaza Temanita ka nanao hoe:

²Tokony handahatra hevi-dravina va ny olon-kendry, ka hameno ny kibony amin'ny rivotra avy any atsinanana va,

³Ary hamaly amin'ny teny tsy mahasoa sy ny teny tsy mahatsara?

⁴Eny, foananao ny fahatahorana an'Andriamanitra, ary tampenanao ny fivavahana eo anatrehany;

⁵Fa ny helokao no manesika ny vavanao, ary mianatra ny lelan'ny fetsy ianao.

⁶Ny vavanao ihany no manameloka anao, fa tsy izaho; Ary ny molotrao ihany no mamely anao.

⁷Hianao va no voalohany izay nateraka ho olombelona? Na naloaky ny kibo talohan'ny tendrombohitra va ianao?

⁸Isan'ny mpihevitra teo amin'Andriamanitra va ianao, ka voarombakao ho anao irery ny fahendrena?

⁹Inona no fantatrao, ka tsy mba fantatray koa, na saina azonao, ka tsy ato aminay koa?

¹⁰Ny anti-panahy sy ny fotsy volo dia misy ato aminay, eny, olona ela niainana noho ny rainao aza.

¹¹Ataonao ho tsinontsinona va ny fampiononana avy amin'Andriamanitra sy ny teny natao aminao amin'ny fahalemem-panahy?

¹²Nahoana no dia entin'ny fonao ianao? Ary nahoana no mipipy foana ny masonao,

¹³Ka miefonefona amin'Andriamanitra ianao, sady miteniteny foana ny vavanao?

¹⁴Inona ny zanak'olombelona no mba hadio izy? Ary izay tera-behivavy no mba ho marina?

¹⁵Indro, ireo anjeliny aza tsy mahatoky Azy, ary ny lanitra aza tsy madio eo imasony;

¹⁶Koa mainka fa izay vetaveta sy tena ratsy, dia ny olona izay misotro heloka toa rano!

¹⁷Hanambara aminao aho, ka mihainoa ahy fa izay efa hitako no holazaiko,

¹⁸Dia zavatra notorin'ny olon-kendry, fa tsy nafeniny, dia izay azony avy tamin'ny razany;

¹⁹Ireny ihany no nomena ny tany, ary tsy nisy olona hafa firenena nisisika teo aminy.

²⁰Ny ratsy fanahy mijalijaly amin'ny androny rehetra, dia amin'ny taona rehetra voatendry ho an'ny lozabe.

²¹Feo mampitahotra no ren'ny sofiny; Ary na dia miadana aza izy, dia avy hamely azy ihany ny mpandroba.

²²Tsy manantena ho afaka amin'ny maizina izy; Andrasan'ny sabatra izy.

²³Mirenireny hitady izay hohaniny izy ka manao hoe: Aiza re? Fantany fa antomotra azy ny andro maizina.

²⁴Fahoriana sy fahaporitana no mampitahotra azy; Mandresy azy ireo tahaka ny mpanjaka efa vonona ho amin'ny ady,

²⁵Satria naninjitra ny tanany hanohitra an'Andriamanitra izy Ary nirehareha hanohitra ny Tsitoha.

²⁶Mimaona amin'ny fahamafian-katoka hamely Azy izy, dia amin'ny foitran'ampingany matevina,

²⁷Satria efa matavitavy tarehy izy, ary mivalon-kotraka ny valahany;

²⁸Ary monina ao an-tanana rava izy, dia ao an-trano tokony tsy hitoeran'olona, izay efa voatendry ho korontam-bato.

²⁹Tsy hanan-karena izy, sady tsy haharitra ny heriny, ka tsy ho vokatra ambonin'ny tany ny fananany.

³⁰Tsy ho afaka amin'ny maizina izy; ny solofony hikainkona azon'ny lelafo; ho levon'ny fofonain'Andriamanitra izy.

³¹Aoka tsy ho voafitaka hatoky zava-poana izy; fa zava-poana no ho valiny homena azy.

³²Raha mbola tsy tonga aza ny androny, dia manjo azy izany, ary tsy ho maitso ny sampany.

³³Ho tahaka ny voaloboka manintsana ny voany manta izy ary ho tahaka ny hazo oliva mampiraraka ny voniny.

³⁴Fa tsy ho vanona ny ankohonan'ny mpihatsaravelatsihy, ary ho lanin'ny afo ny tranon'ny mpitoroka.

³⁵Torontoronina fampahoriana izy ka miteraka fandozana, ary ny kibony mamorom-pitaka.