Read Malagasy Joba 18 Bible Online

Joba 18 - Malagasy bible

Joba 18

¹Dia namaly Bildada Sohita ka nanao hoe:

²Mandra-pahoviana no hamandrika teny ianareo? Mba hendre aloha, dia vao hiteny izahay.

³Sao ataonareo ho biby anie izahay ka tahaka ny maloto eo imasonareo?

⁴Ry ilay mamiravira tena amin'ny fahatezerana, noho ny aminao va no hahatonga ny tany ho lao, ary ny vatolampy hafindra hiala amin'ny fitoerany?

⁵Tsy izany, fa ho faty ny jiron'ny ratsy fanahy, ary hilopilopy ny lelafony;

⁶Ny mazava manjary maizina ao amin'ny lainy, ary ny jirony eo amboniny dia maty.

⁷Etena ny herin'ny diany, ary ny fisainany ihany no mandavo azy.

⁸Fa ny tongony ihany no mahatonga azy eo amin'ny fandrika harato, ka manitsaka eo amin'ny harato izy;

⁹Azon'ny fandrika ny ombelahin-tongony ary voahazon'ny tadivavarana

¹⁰Miafina ao amin'ny tany ny fandrika haningotra azy sy ny tonta eny an-dalana.

¹¹Fampitahorana no mampitahotra azy manodidina ka mampivadi-po azy eny amin'ny alehany rehetra.

¹²Liana azy ny loza, ary ny fandringanana dia vonona eo anilany;

¹³Eny, laniny tsikelikely ny hodiny; ny momba ny tenany dia lanin'ny lahimatoan'ny fahafatesana.

¹⁴Ongotana hiala amin'ny lainy ny zavatra itokiany, ka tsy maintsy ho entina ho amin'ilay mpanjaka mampahatahotra indrindra izy.

¹⁵Izay tsy taranany no hitoetra ao amin'ny lainy; Solifara no hafafy amin'ny fonenany.

¹⁶Maina ny fakany ao ambany, ary tapaka ny rantsany eo ambony.

¹⁷Ny fahatsiarovana azy dia very tsy ho eo amin'ny tany. Ary tsy malaza eny ivelany izy.

¹⁸Roahina hiala amin'ny mazava ho any amin'ny maizina izy ary enjehina hiala amin'izao tontolo izao.

¹⁹Tsy manana fara mandimby eo amin'ny fireneny izy, ka tsy misy tsy tratry ny loza ny ao amin'ny fonenany.

²⁰Ny manjo azy dia italanjonan'ny any andrefana, ary ny any atsinanana raiki-tahotra.

²¹Izany tokoa no anjaran'ny ratsy fanahy, ary izany no manjo ny tsy mahalala an'Andriamanitra.