Read Malagasy Joba 23 Bible Online

Joba 23 - Malagasy bible

Joba 23

¹Dia namaly Joba ka nanao hoe:

²Mbola atao ho fikomianao ihany ny fitarainako; Ny tanana mamely ahy dia mitambesatra amin'ny fisentoako.

³Enga anie ka ho fantatro izay hahitako Azy ka ho tonga any amin'ny fitoerany aza!

⁴Dia handahatra ny teniko eo anatrehany aho. Ka hofenoiko ny teny alahatro ny vavako;

⁵Ary hahalala izay teny havaliny ahy aho sy hamantatra izay holazainy amiko.

⁶Hery lehibe va no handaharany teny amiko? Tsia, fa Izy indrindra no hihaino ahy

⁷Fa amin'izany dia olona marina no ho nifandahatra taminy; Ka dia ho nanan-drariny mihitsy aho tamin'ny Mpitsara ahy.

⁸Indro, miantsinanana aho, fa tsy any Izy; Ary miankandrefana aho, fa tsy hitako Izy;

⁹Mianavaratra amin'izay iasany aho, fa tsy tazako Izy; Mivily any atsimo Izy, ka tsy hitako.

¹⁰Fa mahalala ny lalana falehako Izy; Raha hizahany toetra aho, dia hivoaka tahaka ny volamena.

¹¹Ny tongotro nifikitra tamin'ny lalany; Eny, ny lalany no nizorako tsara, ka tsy nivily aho.

¹²Ny didin'ny molony tsy mba nialako; Ny tenin'ny vavany noraketiko mihoatra noho ny faniriako.

¹³Nefa tsy miova saina Izy, iza no mahasakana Azy? Fa na inona na inona irin'ny fanahiny dia ataony.

¹⁴Eny, manatanteraka izay voatendry ho ahy Izy; Ary zavatra maro toy izany no ao aminy;

¹⁵Roa Izany no mampangovitra ahy eo anatrehany; Raha misaintsaina izany aho, dia matahotra Azy.

¹⁶Fa Andriamanitra no mandrerakany foko, ary ny Tsitoha no mampangovitra ahy;

¹⁷Fa tsy ny fahamaizinana no maharesy ahy, na ny maizim-pito izay manarona ny tavako.