Read Malagasy Joba 28 Bible Online

Joba 28 - Malagasy bible

Joba 28

¹Fa misy tany fihadiana volafotsy, ary misy tany fahazoana volamena, izay diovina.

²Ny vy dia alaina avy amin'ny tany, ary ny varahina arendrika avy amin'ny vato.

³Ny mpihady vola mampisava ny maizina ka mizaha hatramin'ny faran'ny zavatra rehetra ao, dia ny vaton'ny aizim-pito sy ny aloky ny fahafatesana;

⁴Mihady lavaka mihalavitra amin'izay itoeran'olona izy ka tsy ampoizin'ny tongotra akory, ary mihantona sy mitsingevaheva any ambany lavitra ny olona izy.

⁵Ny tany no ihavian'ny hanina; Ary ny ao ambaniny dia avadika tahaka ny afo.

⁶Fitoeran'ny safira ny vatony, ary misy akoram-bolamena ao aminy

⁷Làlana tsy fantatry ny vorona mpihaza ary tsy hitan'ny mason'ny voromahery,

⁸Sady tsy nodiavin'ny zanaky ny bibi-dia ary tsy mba nalehan'ny liona masiaka.

⁹Maninjitra ny tànany amin'ny vatokaranana ireo ary mamadika ny tendrombohitra hatramin'ny fotony;

¹⁰Ny vatolampy tatahany hatao lalan-drano, ary izay zava-tsoa rehetra dia hitan'ny masony avokoa.

¹¹Tampenany ny lalan-drano mba tsy hisy mitete. Ary izay zava-miafina dia avoakany ho amin'ny mazava.

¹²Fa aiza kosa no hahitana ny fahendrena? ary aiza no fitoeran'ny fahalalana?

¹³Tsy misy zanak'olombelona mahalala ny vidiny, ary tsy hita eo amin'ny tanin'ny velona izy.

¹⁴Hoy ny lalina: Tsy ato anatiko izy; Ary, tsy ato amiko izy, hoy ny ranomasina.

¹⁵Ny volamena tsara tsy mahatakalo azy, ary ny volafotsy tsy azo lanjaina ho vidiny;

¹⁶Ny volamena avy any Ofira tsy ampy ho tombany, na ny beryla saro-bidy sy ny safira aza.

¹⁷Ny volamena sy ny fitaratra tsy azo ampitahaina aminy, ary tsy azo takalozana firavaka tena volamena izy.

¹⁸Tsy tokony hotsaroana akory ny voahangy sy ny vato krystaly, fa ny fahazoana fahendrena dia mihoatra noho ny voahangy.

¹⁹Ny topaza avy any Etiopia dia tsy azo ampitahaina aminy, ary tsy mahatakalo azy ny tena volamena tsara

²⁰Dia avy aiza ary ny fahendrena? Ary aiza no fitoeran'ny fahalalana?

²¹Miafina amin'ny mason'ny velona rehetra izany ary takona amin'ny voro-manidina.

²²Hoy Abadona sy Ifahafatesana: Ny sofinay ihany no nandrenesany ny filazana azy.

²³Andriamanitra ihany no mahalala ny lalana ho any aminy, ary Izy no mahafantatra ny itoerany;

²⁴Fa Izy no mitsinjo hatramin'ny faran'ny tany ary mahatazana manerana izao ambanin'ny lanitra rehetra izao,

²⁵Ka manendry ny lanjan'ny rivotra ary mamatra ny rano amin'ny famarana.

²⁶Raha nanao lalana ho an'ny ranonorana Izy sy lalana halehan'ny helatry ny kotrokorana,

²⁷Dia nahita ka nanambara azy Izy; Eny, nanorina azy Izy sady namantatra azy;

²⁸Dia hoy Izy tamin'ny olona: Indro, ny fahatahorana ny Tompo no fahendrena. Ary ny fialàna amin'ny ratsy no fahalalana.