Read Malagasy Joba 29 Bible Online

Joba 29 - Malagasy bible

Joba 29

¹Dia mbola nandroso nanao oha-teny ihany Joba ka nanao hoe:

²Enga anie ka ho tahaka ny tamin'ireny volana lasa ireny aho! Dia tahaka ilay tamin'ny andro niarovan'Andriamanitra ahy!

³Fony mbola nazava teo ambonin'ny lohako ny jirony, ary ny fahazavany no nandehanako tao amin'ny maizina;

⁴Eny, tahaka ny toetro fony aho mbola fararano, raha niseho teo ambonin'ny laiko ny fisakaizan'Andriamanitra;

⁵Fony mbola tao amiko ny Tsitoha, Ary nanodidina ahy ny zanako;

⁶Fony mbola nanasa ny tongotro tamin'ny rononomandry aho, ary ny vatolampy namoaka renirano diloilo teo amiko;

⁷Raha niainga niakatra ho eo amin'ny vavahadin'ny tanàna aho ka nametraka ny fipetrahako teo ankalalahana,

⁸Dia nahita ahy ny zatovo ka niampirimpirina; Ary niainga ny fotsy volo, dia nijoro;

⁹Nangina tsy niteny ny lehibe ka nitampim-bava;

¹⁰Tsy sahy niteny ny mpanapaka, ary ny lelany niraikitra tamin'ny lanilaniny.

¹¹Izay sofina nandre dia nanao ahy hoe sambatra; Ary Izay maso nahita dia vavolombelona ho ahy,

¹²Satria namonjy ny ory izay nitaraina aho sy ny kamboty izay tsy nanan-kamonjy.

¹³Ny fisaoran'izay efa ho faty dia tonga tamiko; Ary ny fon'ny mpitondratena nampifaliko.

¹⁴Nitafy fahamarinana aho, ka mba nitafy ahy kosa izy; Eny, tahaka ny lamba sy ny hamama ny rariny izay nananako.

¹⁵Efa maso ho an'ny jamba aho ary tongotra ho an'ny mandringa.

¹⁶Efa ray ho an'ny malahelo aho, ary ny adin'ny olona tsy fantatro aza nodinihiko.

¹⁷Namaky ny nifin'ny ratsy fanahy aho ka nandrombaka ny babo teo am-bavany

¹⁸Dia hoy izaho: Eo amin'ny akaniko ihany no hialako aina, ary hanamaro ny androko toy ny fasika aho.

¹⁹Ny fakako ho azon'ny rano, ary ny ando hitoetra amin'ny sampako mandritra ny alina.

²⁰Ho vaovao amiko lalandava ny voninahitro, ary ny tsipikako hihahenjana eny an-tanako.

²¹Nihaino ahy ny olona, dia niandry, ka nangina tamin'ny fanolorako saina izy.

²²Rehefa niteny aho, dia tsy mba namaly intsony izy; ary nitetevan'ny teniko izy.

²³Niandry ahy toy ny fiandry ny ranonorana izy ary nitanatana vava toy ny fiandry ny fara-orana.

²⁴Raha nisy nila ho ketraka, dia mbola niseho miramirana taminy ihany ny tarehiko, ary tsy nahamaloka ny fahazavan'ny tavako ireo.

²⁵Nifidy ny lalan-kalehany aho ka nipetraka ho lohany, eny, nitoetra toy ny mpanjaka teo amin'ny miaramila sy toy ny mpampionona ny misaona aho.