Read Malagasy Joba 3 Bible Online

Joba 3 - Malagasy bible

Joba 3

¹Rehefa afaka izany, dia niloa-bava Joba ka nanozona ny androny

³Foàna anie ny andro nahaterahako sy ny alina izay nanao hoe: Misy zazalahy vao torontoronina!

⁴Izany andro izany dia aoka ho maizina, ary aoka tsy hitady azy Andriamanitra any ambony; ary aoka tsy hisy mazava hamirapiratra aminy;

⁵Aoka ny aizina sy ny aloky ny fahafatesana hahalasa azy indray; Aoka ny rahona hitatao eo amboniny; Aoka izay zavatra mahamaizina ny andro hampahatsiravina azy.

⁶Izany alina izany aoka ny aizim-pito hisambotra azy; Aoka tsy hiara-mifaly amin'ny andron'ny taona izy. Ary tsy ho tonga amin'ny isan'ny volana;

⁷Indro izany alina izany aoka ho momba izy; Aoka tsy ho velona ao ny hoby;

⁸Aoka hanozona azy ny mpanozona andro, Izay mahay mamoha ny dragona;

⁹Aoka ho maizina ny kintan'ny marainany; Aoka hiandry ny mazava izy, nefa tsy hisy, ary aoka tsy ho faly mahita ny hodimason'ny maraina izy,

¹⁰Satria tsy nanidy ny varavaran'ny kibon'ineny izy ka tsy nanafina fahoriana tamin'ny masoko.

¹¹Nahoana re aho no tsy maty hatrany am-bohoka e, ary tsy niala aina, fony vao nivoaka avy tany an-kibo e?

¹²Nahoana no nisy lohalika niandry ahy? Ary nahoana no nisy nono hinonoako?

¹³Fa raha tsy izany, dia efa nandry aho toy izay ka niadana, eny, natory aho ka afa-tsasatra,

¹⁴Teo amin'ny mpanjaka sy ny mpanolo-tsaina avy amin'ny tany, izay nanao ireny tanàna efa rava,

¹⁵Na teo amin'ny andriandahy izay manana volamena sady mameno volafotsy ny tranony;

¹⁶Na efa tsy ary toy ny zaza tsy tonga volana aho ka nafenina, dia toy ny zaza izay tsy nahita ny mazava akory.

¹⁷Any no itsaharan'ny ratsy fanahy tsy hampitebiteby, ary any ny reraka no afa-tsasatra;

¹⁸Miara-miadana avokoa ny mpifatotra; Tsy mandre ny feon'ny mpampiasa izy.

¹⁹Samy any ny kely sy ny lehibe, Ary ny mpanompo dia afaka amin'ny tompony.

²⁰Nahoana no fahazavana no mba omena ny reraka, ary fiainana ho an'izay latsaka amin'ny fangidiana?

²¹Izay miandry fahafatesana, nefa tsy avy izy, sady mitady azy mihoatra noho ny fitady harena nafenina:

²²Izay faly indrindra sady ravoravo, raha mahita ny fasana,

²³Dia olona izay mandeha ao amin'ny maizina sady voafefin'Andriamanitra manodidina.

²⁴Fa mialoha ny haninkaniko ny fitolokoko, ary migororoana toy ny rano ny fidradradradrako;

²⁵Fa Izay atahorako no mahazo ahy, ary izay angovitako no manjo ahy.

²⁶Tsy mbola nahita fiadanana na fitsaharana na fakàna aina akory aza aho, dia tonga indray ny tebiteby.