Read Malagasy Joba 36 Bible Online

Joba 36 - Malagasy bible

Joba 36

¹Ary mbola nandroso niteny ihany Eliho ka nanao hoe:

²Mahareta kely amiko, dia hambarako aminao, fa mbola misy teny holazaina hanamarina an'Andriamanitra.

³Halaiko avy lavitra ny fahalalako, ka hanamarina ny Mpanao ahy aho.

⁴Fa tsy lainga tsy akory ny teniko; Lehilahy tanteraka amin'ny fahalalana no eto aminao.

⁵Indro, lehibe Andriamanitra, kanefa tsy mba mamingavinga, lehibe amin'ny herin'ny fahalalana Izy.

⁶Tsy mitsimbina ny ain'ny ratsy fanahy Izy, fa manome rariny ho an'ny ory.

⁷Tsy mampiala ny masony amin'ny marina Izy; Eo amin'ny mpanjaka ambonin'ny seza fiandrianany no ampitoerany azy ho mandrakizay, ka dia tafasandratra.

⁸Ary raha voafatotra amin'ny gadra izy sy voafehy amin'ny tadin'ny fahoriana.

⁹Dia ambarany azy ny asany sy ny fahotany, fa efa nanandra-tena izy ireny.

¹⁰Dia manokatra ny sofiny hihaino fananarana Izy ka mandidy azy hibebaka hiala amin'ny ratsy.

¹¹Raha mihaino ka manaiky Azy Izy, dia lany amin'ny fiadanana ny androny, ary ny taonany amin'ny fahafinaretana

¹²Fa raha tsy mihaino kosa izy, dia ho voan'ny fiadiana ka ho faty tsy amim-pahalalana.

¹³Fa ny mpihatsaravelatsihy dia mirakitra fahatezerana; Tsy mitaraina izy, na dia afatony aza;

¹⁴Ka dia maty raha mbola tanora izy, eny, afaka ny ainy eo amin'ny olom-betaveta,

¹⁵Fa ny fahorian'ny ory kosa no entin'Andriamanitra mamonjy azy, Ary ny manjo azy no entiny manokatra ny sofiny.

¹⁶Ary na dia ianao aza dia ampialainy amin'ny fahaterena ho amin'ny malalaka izay tsy misy mahatery; Ary ny matavy indrindra no aroso ho eo ambonin'ny latabatrao.

¹⁷Nefa raha fatra-pikikitra amin'ny adin'ny ratsy fanahy ianao, dia hihazona anao ny ady sy ny fanamelohana;

¹⁸Aoka tsy hamporisika anao hiteny ratsy ny fahatezerana, ary aoka tsy hampivily hevitra anao ny halehiben'ny avotra.

¹⁹Moa hahatonga anao ho ao amin'izay tsy misy fahoriana va ny fitarainanao na izay rehetra tratry ny fahatanjahana?

²⁰Aza irinao ny hihavian'ny alina, izay ampialana ny olona amin'ny fitoerany.

²¹Tandremo, aza mivily ho amin'ny ratsy; Fa saingy ozoim-pahoriana ianao, dia mifidy izany.

²²Indro, Andriamanitra miasa amin'ny heriny mampiseho ny fisandratany; Iza no mba mpampianatra tahaka Azy?

²³Iza no efa nandidy Azy ny amin'izay lalan-kalehany? Ary iza no efa nilaza taminy hoe: Efa nanao ratsy Hianao?

²⁴Tsarovy ny hankalaza ny asany, Izay efa nataon'ny olona an-kira.

²⁵Fa faly mahita izany ny olona rehetra; Ary jeren'ny zanak'olombelona eny lavitra eny izany.

²⁶Indro, lehibe Andriamanitra, ka tsy takatry ny saintsika Izy; Ary tsy hita isa ny taonany.

²⁷Fa mampisavoana ny rano Izy, dia milatsaka ho ranonorana aman-javona izany,

²⁸Izay aidin'ny rahona ka alatsany amin'ny olona maro be.

²⁹Ary koa, iza moa no mahalala ny amin'ny fivelatry ny rahona sy ny fikotrokotroka ao an-dainy?

³⁰Indro, mamelatra ny fahazavany eo amboniny Izy ary manao ny fanambanin'ny ranomasina ho firakofany.

³¹Fa ireny zavatra ireny no itsarany ny firenena sady anomezany hanina betsaka.

³²Mifono fahazavana ny tànany, ary baikoiny iny mba hahavoa ny fahavalony;

³³Ny fikotrokotrony dia manambara Azy, ary ny omby aman'ondry koa aza milaza ny hihaviany.