Read Malagasy Joba 37 Bible Online

Joba 37 - Malagasy bible

Joba 37

¹Eny, izany no mampitepotepo ny foko ka mampiemponempona azy hiala amin'ny fitoerany.

²Mihainoa dia mihainoa ny fikotrokotroky ny feony sy ny rohona izay mivoaka avy amin'ny vavany.

³Mandefa izany ho eny ambanin'ny lanitra rehetra Izy, ary ny helatra hatramin'ny faran'ny tany.

⁴Manarakaraka izany, dia misy feo mirohondrohona; Mampikotrokotroka ny feon'ny fahalehibiazany Izy, ka rehefa re ny feony, dia tsy sakanany ny helatra.

⁵Mahagaga ny fikotrokotrok'Andriamanitra amin'ny feony; Manao zava-dehibe tsy takatry ny saintsika Izy.

⁶Fa ny oram-panala baikoiny hoe: Milatsaha eny ambonin'ny tany ianao; Ary toy izany koa ny ranonorana mivatravatra, eny, dia ny ranonorany mivatravatra mafy.

⁷Mampiohona ny tanan'ny olona rehetra Izy, mba samy hahalala izany ny olona rehetra izay nataony;

⁸Ary miditra ao am-piereny koa ny bibidia ka mamitsaka ao an-davany.

⁹Avy any atsimo ny tadio, ary entin'ny rivotra avy any avaratra ny hatsiaka.

¹⁰Ny fofonain'Andriamanitra mahamisy ranomandry, ka voageja ny rano malalaka.

¹¹Ny rahona matevina tambesarany rano, ary ny rahon'ny helatra dia ampieleziny;

¹²Dia mihodinkodina araka ny fitarihany azy ireo hanatanteraka izay rehetra andidiany azy eny ambonin'ny tany eran'izao tontolo izao,

¹³Na alatsany ho famaizana raha tokony ho an'ny taniny izany na ho famindram-po kosa.

¹⁴Mihainoa izany, ry Joba; Mijanona, ka mba diniho ny fahagagana ataon'Andriamanitra.

¹⁵Fantatrao va ny fanamboaran'Andriamanitra ireny sy ny fampitselatselany ny helatry ny rahony?

¹⁶Fantatrao va ny fihevahevan'ny rahona matevina, dia ny fahagagana avon'Ilay tanteraka amin'ny fahalalana?

¹⁷Hianao izay mahatsiaro ny fitafianao ho mafana, raha migaingaina ny andro azon'ny rivotra avy any atsimo,

¹⁸Moa ianao niara-nanao taminy va, raha namelatra ny habakabaka Izy, izay mitoetra mafy toy ny zavatra manganohano natao an-idina?

¹⁹Mba ampianaro anay ary izay holazainay aminy; Fa tsy hitanay izay halahatray noho ny aizina,

²⁰Holazaina aminy va, raha miteny aho? Moa misy olona maniry ho levona tokoa va?

²¹Tsy hita ankehitriny ny mazava, Izay mamirapiratra any amin'ny rahona: Nefa raha mandalo ny rivotra, dia mampisava azy ihany izany.

²²Avy any avaratra no ihavian'ny mazava mitarehim-bolamena; Ao amin'Andriamanitra ny voninahitra mahatahotra.

²³Ny Tsitoha, tsy mahita Azy isika; Izay lehibe amin'ny hery sy ny fitsarana mbamin'ny fahamarinana tanteraka dia tsy mba mampahory.

²⁴Koa izany no atahoran'ny olona Azy; Tsy mety mijery izay manao azy ho hendry Izy.