Read Malagasy Joba 39 Bible Online

Joba 39 - Malagasy bible

Joba 39

¹Fantatrao va ny fotoana fiterahan'ny osi-dia any amin'ny harambato? Voahevitrao va ny fiterahan'ny dieravavy?

²Mahisa ny andro ahatanterahany va ianao? Ary fantatrao va ny fotoana fiterahany?

³Miondrika izy ka teraka, sady alefany ny faharariany.

⁴Donga ny zanany, mihalehibe any an-efitra ireny; Mivoaka izy ka tsy mety miverina intsony.

⁵Iza moa no nandefa ny boriki-dia ho karenjy? Ary iza no namaha ny fatoran'ny boriki-dia,

⁶Izay nomeko ny tani'hay ho fitoerany ary ny tanin-tsira ho fonenany?

⁷Ihomehezany ny fitabatabana ao an-tanàna; Tsy ahoany akory ny fiantsoantson'ny mpampandeha;

⁸Any an-tendrombohitra rehetra any no fihinanany, ary mitady ny zava-maitso rehetra izy.

⁹Mba mety manompo anao va ny ombimanga na handry ao am-pahitrao amin'ny alina?

¹⁰Mahafatotra ny ombimanga amin'ny mahazaka ho ao am-bavasanao va ianao? Na mety manaraka anao handravona bainga any an-dohasaha va izy?

¹¹Azonao itokiana va izy satria lehibe ny heriny? Ary havelanao hataony va ny asanao?

¹²Azonao itokiana hitondra ny varinao mody va izy sy hanangona izany ho eo am-pamoloanao?

¹³Mikopakopaka noho ny fifaliana ny elatry ny ostritsa; Nefa mahalemy fanahy azy va ny elany sy ny volony?

¹⁴Tsia, fa mandao ny atodiny ao amin'ny tany izy ka mamela azy ho afanain'ny vovoka,

¹⁵Ary tsy ahiny izay ho voaporitry ny tongotra ireo. Na ho voahitsaky ny bibi-dia.

¹⁶Tsy tia ny zanany izy fa ataony hoatra ny tsy azy ireny; Efa very foana izay nisasarany, nefa tsy ahoany akory izany;

¹⁷Fa efa nampanadinoin'Andriamanitra ny fahendrena izy, ary Tsy nomeny anjara fahalalana.

¹⁸Raha mikopakopak'elatra toa hanidina izy, dia ihomehezany ny soavaly sy ny mpitaingina azy.

¹⁹Moa manome hery ny soavaly va ianao, na manarona vombo mihofahofa ny vozony?

²⁰Mahay mampitsipika azy tahaka ny valala va ianao? Mahatsiravina ny hamafin'ny fiefonefony!

²¹Mihehy ao amin'ny lohasaha izy ka mifalifaly noho ny heriny; Mandroso hanetra ny ady izy.

²²Mihomehy ny tahotra izy, fa tsy mety mivadi-po. Ary tsy mianotra amin'ny sabatra.

²³Mifioka eny amboniny ny zana-tsipìka sy ny lefona manelatselatra ary ny lefom-pohy.

²⁴Miriotra mafy amin'ny fahavinirana sy ny fahatezerana izy ka tsy mety mijanona intsony, rehefa maneno ny anjomara.

²⁵Na oviana na oviana no anenoan'ny anjomara dia mihiaka izy. Ary manimbolo ny ady izy, raha mbola lavitra, dia ny akoralava sy ny fitabataban'ny manamboninahitra.

²⁶Ny fahendrenao va no mampanidina ny hitsikitsika sy mampamelatra ny elany hianatsimo?

²⁷Noho ny didinao va no iakaran'ny voromahery sy anaovany ny akaniny eny an-dringiringy?

²⁸Eny amin'ny harambato no itoerany sy anaovany ny akaniny, dia eo an-tampon'ny harambato sy ao amin'ny fiarovana.

²⁹Any no itazanany remby; Mahatsinjo lavitra ny masony.

³⁰Mitsentsitra rà ny zanany, ary izay itoeran'ny faty dia any izy.