Read Malagasy Joba 4 Bible Online

Joba 4 - Malagasy bible

Joba 4

¹Dia namaly Elifaza Temanita ka nanao hoe:

²Raha misy sahy miteny aminao, dia ho sosotra va ianao? Fa raha ny mamehy vava kosa, iza moa no mahazaka izany?

³Indro, efa nananatra ny maro ianao. Ary ny tanana miraviravy efa nampaherezinao;

⁴Ny teninao efa nanohana izay efa saiky lavo, ary ny lohalika malemy efa nampahatanjahinao

⁵Nefa ankehitriny mba manjo anao kosa izany, ka dia kivy ianao, Mihatra aminao izany, ka raiki-tahotra ianao

⁶Tsy ny fivavahanao va no tokinao? Ary tsy fanantenanao va ny fahitsian'ny lalanao?

⁷Masìna ianao, tsarovy fa iza moa no very tsy nanan-tsiny? Ary taiza no nisy olo-mahitsy naringana?

⁸Araka izay efa hitako, dia izay miasa heloka sy mamafy fahoriana no mijinja izany.

⁹Ny fofonain'Andriamanitra no andringanana azy. Eny, ny fofonain'ny fahatezerany no mahalevona azy.

¹⁰Ny feon'ny olona, eny, ny feon'ny liona masiaka, ary ny nifin'ny liona tanora dia ombotana;

¹¹Mirenireny ny lion-dahy noho ny tsi-fahitany remby, ary miely ny zanaky ny liom-bavy.

¹²Nisy teny tonga tamiko mangingina, ary ny sofiko nahare siosio avy taminy,

¹³Tamin'ny eritreritra avy amin'ny tsindrimandry alina, raha sondrian-tory ny olona,

¹⁴Dia azon-tahotra sy hovotra aho, ka nampihorohoro ny taolako rehetra izany.

¹⁵Ary nisy fanahy nandalo teo anatrehako ka nampitsangam-bolo ny tenako.

¹⁶Nijanona izy, nefa tsy nahafantatra ny tarehiny aho; Nisy endri-javatra teo anoloan'ny masoko; Nisy fanginana, dia nandre feo aho nanao hoe:

¹⁷Ho marina noho Andriamanitra va ny zanak'olombelona? Ho madio noho ny Mpanao azy va ny olona?

¹⁸Indro, tsy matoky ireo mpanompony aza Izy, eny, ny anjeliny aza ataony ho tsy tonga ohatra.

¹⁹Koa mainka izay mitoetra ao an-trano tany, sady avy tamin'ny vovoka no nihaviany, ary mora poritra noho ny kalalao izy;

²⁰Indray andro monja dia montsana izy; Tsy misy misaina azy, na dia levona mandrakizay aza izy.

²¹Tsy voaongotra va ny kofehin-dainy ao aminy? Maty izy, nefa tsy mbola nanam-pahendrena.