Read Malagasy Joba 41 Bible Online

Joba 41 - Malagasy bible

Joba 41

¹Indro, foana ny fihendrena azy; Tsy mahakivy va na dia ny fijery azy aza?

²Tsy misy sahy manao vi-very hanaitra azy; Koa iza kosa no mahajanona eo anatrehako?

³Iza no nanome Ahy aloha mba hamaliako azy? Ny eny ambanin'ny lanitra rehetra dia Ahy avokoa.

⁴Tsy mbola hangina Aho ny amin'ny momba ny tenany sy ny heriny ary ny fahatsaran'ny endriny.

⁵Iza no mahasonga ny fitafiany anoloany? Na iza no sahy hiditra ao amin'ny nifiny roa sosona?

⁶Iza no mahasokatra ny varavaran'ny tavany? Mahatsiravina ny nifiny manodidina!

⁷Reharehany ny faharaoraon'ny kirany, mihidy avokoa toy ny voapetaka mafy amin'ny tombo-kase ireo;

⁸Mikirindro ireo, ka tsy azon'ny rivotra idirana eo anelanelany.

⁹Mifanindry lany ireo sady mifaniditra ka tsy azo sarahina,

¹⁰Ny fieviny dia mampamirapiratra fahazavana, ary ny masony dia tahaka ny hodimason'ny maraina.

¹¹Lelafo no mivoaka avy amin'ny vavany; Kilalaon'afo no mipariaka avy aminy.

¹²Ny vavorony dia ivoahan'ny setroka, tahaka ny avy amin'ny vilany mangotraka, na amin'ny fahandroana.

¹³Ny fofonainy mampirehitra arina, ary misy lelafo mivoaka avy amin'ny vavany.

¹⁴Ny vozony no itoeran'ny hery; Ary mibitaka eo alohany ny fampahatahorana.

¹⁵Mivalombalona ny hotraka amin'ny tenany; Mafy ireny ka tsy azo endahana.

¹⁶Mafy tahaka ny vato ny fony; Eny, mafy tahaka ny vato fikosoham-bary.

¹⁷Raha mitsangana izy, dia raiki-tahotra ny mahery; Eny, toran-kovitra ireo ka tsy mahavoa.

¹⁸Raha misy mamely azy amin'ny sabatra dia tsy mahalaitra, na amin'ny lefom-pohy, na ny firombaka, na ny zana-tsipìka.

¹⁹Ataony toy ny mololo ny vy, ary toy ny hazo momoka ny varahina.

²⁰Tsy mampandositra azy ny zana-tsipìka; Ataony ho toy ny vodivary ny vaton'antsamotady.

²¹Ataony ho toy ny vodivary koa ny langilangy; Ihomehezany ny fanetsehana ny lefona.

²²Ny takibany dia tahaka ny tavim-bilany maranitra; Mamelatra fivelezam-bary maranitra eo amin'ny fotaka izy.

²³Mampandevy ny lalina ho tahaka ny ao am-bilany izy; Manao ny ranomasina ho tahaka ny vilany misy menaka manitra izy.

²⁴Mampahazava ny lalany eo aoriany izy. Ataon'ny olona ho toy ny volo fotsy ny lalina.

²⁵Tsy misy tahaka azy eny ambonin'ny tany, izay voaforona tsy hahalala tahotra.

²⁶Ny avo rehetra jereny avokoa; Mpanjakan'ny bibi-dia rehetra izy