Read Malagasy Joba 8 Bible Online

Joba 8 - Malagasy bible

Joba 8

¹Dia namaly Bildada Sohita ka nanao hoe:

²Mandra-pahoviana no hiteny toy izany ianao, ka ho rivotra mahery ny teny aloaky ny vavanao?

³Andriamanitra va hamadika ny fitsarana, na ny Tsitoha hamadika ny rariny?

⁴Raha nanota taminy ny zanakao, dia efa nampanodiaviny azy ny fahadisoany.

⁵Fa raha ianao kosa mandroso mitady an'Andriamanitra ka mifona amin'ny Tsitoha.

⁶Ary raha madio sy mahitsy ianao, dia hifoha hamonjy anao tokoa Izy ary hampiadana indray ny fonenan'ny fahamarinanao,

⁷Ka na dia kely aza no niandohanao, dia ho lehibe indrindra no hiafaranao.

⁸Fa masìna ianao, anontanio ange ny ntaolo, ka fantaro ny hevitra hitan'ny razany

⁹(Fa vao omaly isika ka tsy mba mahalala, fa aloka ihany ny androntsika etỳ ambonin'ny tany);

¹⁰Tsy ireny va no hampianatra anao ka hilaza aminao ary hamoaka teny avy ao am-pony?

¹¹Haniry va ny zozoro, raha tsy eny amin'ny fotaka? Hitrebona va ny harefo, raha tsy misy rano?

¹²Mbola maitso izy sady tsy voajinja, kanefa malazo alohan'ny zava-maitso rehetra.

¹³Toy izany no lalan'izay rehetra manadino an'Andriamanitra; Ary ho very ny fanantenan'ny mpihatsaravelatsihy,

¹⁴Fa ho maito ny fanantenany, eny, ho tranon-kala ny tokiny.

¹⁵Miankina amin'ny tranony izy, kanjo tsy maharitra iny; Mihazona azy mafy izy, kanjo tsy mahazaka azy iny.

¹⁶Mitsimoka tsara tandrifin'ny masoandro izy, ary ny rantsany misandrahaka eo amin'ny tanimboliny;

¹⁷Mifelipelika mifaniditra eo amin'ny korontam-bato ny fakany ary mahazo any anelanelany;

¹⁸Kanjo nony fongorany hiala amin'ny fitoerany izy, dia handà azy izany ka hanao hoe: Tsy mbola nahita anao akory aho.

¹⁹Indro, izany ihany no fifalian'ny lalan-kalehany; ary hisy hafa indray mitrebona avy amin'ny vovoka.

²⁰Indro, Andriamanitra tsy hanary ny olona tsy manan-tsiny ary tsy hitantana ny mpanao ratsy;

²¹Mbola hofenoiny hehy ny vavanao sy hoby ny molotrao.

²²Izay mankahala anao hitafy henatra; Ary tsy hisy intsony ny lain'ny ratsy fanahy.