Read Malagasy Salamo 102 Bible Online

Salamo 102 - Malagasy bible

Salamo 102

¹Fivavaky ny ory, raha reraka izy ka mandoatra ny alahelony eo anatrehan'i Jehovah. Jehovah ô, henoy ny fivavako, Ary aoka hankeo aminao ny fitarainako.

²Aza manafina ny tavanao amiko amin'ny andro fahoriako; Atongilano amiko ny sofinao; Amin'ny andro itarainako dia faingàna hamaly ahy.

³Fa levon-ko setroka ny androko Ary ny taolako mahamay tahaka ny forohana.

⁴Taninina tahaka ny ahitra ny foko ka malazo; Fa hadinoko na dia ny fihinanan-kanina aza.

⁵Noho ny fisentoan'ny foko Ny taolako miraikitra amin'ny hoditro.

⁶Tahaka ny sama any an-efitra aho, Ary tahaka ny vorondolo any an-tanànaolo.

⁷Tsy mahita tory aho Sady tahaka ny tsikirity irery eo an-tampontrano.

⁸Mandatsa ahy mandrakariva ny fahavaloko. Izay misafoaka amiko dia manao ahy ho fiozonana.

⁹Fa lavenona no nohaniko tahaka ny mofo; Ary ny zavatra nosotroiko noharoharoiko ny ranomasoko,

¹⁰Noho ny fahaviniranao sy ny fahatezeranao; Fa naingainao aho, kanefa natontanao indray.

¹¹Ny androko dia tahaka ny aloka efa mandroso; Ary efa malazo tahaka ny ahitra aho.

¹²Nefa Hianao, Jehovah ô, mipetraka manjaka mandrakizay; Ary ny fahatsiarovana Anao mihatra amin'ny taranaka fara mandimby.

¹³Hianao hitsangana ka hamindra fo amin'i Ziona; Fa efa andro hamindram-po aminy izao; Eny, tonga ny fotoana.

¹⁴Fa sitraky ny mpanomponao ny vatony, Sady malahelo ny vovo-taniny izy.

¹⁵Hatahotra ny anaran'i Jehovah ny jentilisa, Ary ny mpanjaka rehetra amin'ny tany hatahotra ny voninahitrao;

¹⁶Fa Jehovah nanangana an'i Ziona; Niseho tamin'ny voninahiny Izy;

¹⁷Nijery ny fivavaky ny mahantra Izy Ka tsy nanevateva ny fivavany.

¹⁸Hosoratana ho an'ny taranaka mandimby izany; Ary izay firenena mbola hoforonina no hidera an'i Jehovah;

¹⁹Fa Izy nitazana tany amin'ny fitoerany masina any amin'ny avo. Tany an-danitra no nitsinjovan'i Jehovah ny tany,

²⁰Mba hihaino ny fisentoan'ny mpifatotra Sy hanafaka izay voatendry ho faty,

²¹Mba hotorina any Ziona ny anaran'i Jehovah, Ary ny fiderana Azy any Jerosalema,

²²Rehefa tafangona ny firenena Sy ny fanjakana maro hanompo an'i Jehovah.

²³Efa nahaketraka ny heriko tany an-dalana Izy; Efa nahafohy ny androko Izy;

²⁴Hoy izaho: Andriamanitro ô; aza maka ahy an-tenatenan'ny androko; Ny taonanao mihatra amin'ny taranaka fara mandimby.

²⁵Tany aloha no nanorenanao ny tany; Ary asan'ny tananao ny lanitra.

²⁶Ireo dia ho levona, fa Hianao no maharitra; Izy rehetra ho rovitra toy ny fitafiana; Toy ny lamba no hanovanao azy, ka hovana izy;

²⁷Fa Hianao no tsy miova, Ary ny taonanao no tsy ho tapitra.

²⁸Ny zanaky ny mpanomponao handry fahizay, Ary ny taranany hampitoerina eo anatrehanao.