Read Malagasy Salamo 104 Bible Online

Salamo 104 - Malagasy bible

Salamo 104

¹Misaora an'i Jehovah, ry fanahiko. Jehovah Andriamanitro ô, lehibe indrindra Hianao, Famirapiratana sy voninahitra no fitafinao,

²Mitafy ny mazava tahaka ny lamba Izy Ary mamelatra ny lanitra tahaka ny lay,

³Ary mametraka ny rairain-drihan'ny tranony amin'ny rano, Sady manao ny rahona matevina ho kalesiny ka mandeha amin'ny elatry ny rivotra,

⁴Ary manao ny rivotra ho irany Sy ny lelafo ho mpanompony.

⁵Nanorina ny tany tambonin'ny fanorenany Izy, Mba tsy hihetseha-ny mandrakizay doria.

⁶Ny rano lalina no nasaronao azy tahaka ny lamba; Nandifotra ny tendrombohitra aza ireny.

⁷Noho ny teny mafy nataonao dia nandositra ny tendrombohitra, Noho ny feon'ny kotrokoranao dia nirifatra izy

⁸Nisondrotra ny tendrombohitra, nietry ny lohasaha ho any amin'izay namboarinao hitoerany.

⁹Efa nasianao fetra tsy hihoarany izy Mba tsy hiverina hanarona ny tany.

¹⁰Mampandeha loharano eny amin'ny lohasaha Izy; Eny anelanelan'ny tendrombohitra no alehan'ireny,

¹¹Ka isotroan'ny bibi-dia rehetra, Sy analan'ny boriki-dia ny hetahetany;

¹²Eo amboniny no itoeran'ny voro-manidina; Ary eo amin'ny ran-tsan-kazo no anenoany.

¹³Manondra-drano ny tendrombohitra avy amin'ny tranony ambony Izy; Ny vokatry ny asanao no mahavoky ny tany.

¹⁴Mampaniry ahitra ho an'ny biby fiompy Izy Sy anana hahasoa ny olona. Ary mamoaka hanina avy amin'ny tany.

¹⁵Ary divay izay mampifaly ny olona, ka mampinendonendo ny tavany mihoatra noho ny diloilo, Ary mofo hanohanana ny ain'ny olona.

¹⁶Voky ny hazon'i Jehovah, Dia ny sederan'i Libanona, izay namboleny;

¹⁷Izay anaovan'ny voron-kely ny akaniny; Ary ny vano, dia ao amin'ny kypreso no anaovany ny tranony.

¹⁸Ny tendrombohitra avo dia ho an'ny osi-dia; Ny harambato no fiarovana ho an'ny hyraka.

¹⁹Nanao ny volana ho fotoana Izy, Ary ny masoandro mahalala ny filentehany.

²⁰Mahatonga aizina Hianao, dia tonga ny alina, Ka mivezivezy ny biby rehetra any an'ala;

²¹Ny liona tanora mierona maniry toha Ka mitady ny haniny avy amin'Andriamanitra.

²²Miposaka ny masoandro, dia miverina ireny, Ary ao an-davany no amitsahany.

²³Fa ny olona kosa mivoaka ho any amin'ny taozavany, Sy ny asany mandra-paharivan'ny andro.

²⁴Endrey ny hamaroan'ny asanao, Jehovah ô! Fahendrena no nanaovanao azy rehetra; Henika ny zavatra nataonao ny tany.

²⁵Indro ny ranomasina sady lehibe no malalaka, Any no misy zava-mihetsiketsika tsy tambo isaina, Dia zava-miaina, na kely na lehibe.

²⁶Any no alehan'ny sambo Sy ny trozona, izay noforoninao hilaolao any.

²⁷Ireo rehetra ireo miandry Anao, Mba homenao ny haniny amin'ny fotoany.

²⁸Manome Hianao, dia manangona izy; Manokatra ny tananao Hianao, dia voky ny soa izy;

²⁹Manafina ny tavanao Hianao, dia raiki-tahotra izy; Alainao indray ny ainy, dia maty izy Ka mody any amin'ny vovoka nanalana azy,

³⁰Maniraka ny Fanahinao Hianao, dia ary izy, Ary manavao ny tarehin'ny tany Hianao.

³¹Ho mandrakizay anie ny voninahitr'i Jehovah; Aoka Jehovah hifaly amin'ny asany.

³²Jereny ny tany, dia mihorohoro; Tendren'ny tànany ny tendrombohitra, dia midonaka.

³³Hihira ho an'i Jehovah aho, raha mbola velona koa; Hankalaza an'Andriamanitro aho, raha mbola miaina.

³⁴Ho maminy anie ny fisainako Azy; Izaho no hifaly amin'i Jehovah.

³⁵Ho lany ringana tsy ho etỳ amin'ny tany ny mpanota, Ary ny ratsy fanahy tsy ho etỳ intsony. Misaora an'i Jehovah, ry fanahiko. Haleloia.