Read Malagasy Salamo 105 Bible Online

Salamo 105 - Malagasy bible

Salamo 105

¹Miderà an'i Jehovah, miantsoa ny anarany; Ataovy fantatra any amin'ny firenena ny asany.

²Mihirà ho Azy, mankalazà Azy; Saintsaino ny fahagagana rehetra ataony.

³Ataovy ho reharehanareo ny anarany masina; Aoka hifaly ny fon'izay mitady an'i Jehovah.

⁴Mitadiava an'i Jehovah sy ny heriny Katsaho mandrakariva ny tavany.

⁵Tsarovy ny asa mahagaga natao-ny Dia ny fahagagany sy ny fitsaran'ny vavany,

⁶Ry taranak'i Abrahama mpanom-pony, Dia ianareo olom-boafidiny, taranak'i Jakoba.

⁷Jehovah, Izy no Andriamanitsika; Manerana ny tany rehetra ny fitsarany.

⁸Mahatsiaro ny fanekeny mandrakizay Izy, Dia ilay teny izay voadidiny ho an'ny taranaka arivo mandimby,

⁹Eny, ilay nataony tamin'i Abrahama, Sy ny fianianany tamin'Isaka;

¹⁰Izay naoriny ho lalana ho an'i Jakoba, Sy ho fanekena mandrakizay ho an'Isiraely,

¹¹Ka nataony hoe: Homeko anao ny tany Kanana, Ho lovanareo voazara amin'ny famolaina,

¹²Fony mbola olom-bitsy izy, Eny, vitsy sady vahiny tao,

¹³Ary nifindrafindra tany amin'ny firenena, Sy nifindrafindra fanjakana ho amin'ny firenen-kafa,

¹⁴Tsy nisy navelany hampahory azy, Ary nananatra mpanjaka Izy noho ny amin'ireo hoe:

¹⁵Aza manendry ireo voahosotro, Ary aza manisy ratsy ireo mpaminaniko.

¹⁶Dia niantso ny mosary ho amin'ny tany Izy; Notapahiny avokoa ny mofo rehetra, izay tohan'aina;

¹⁷Naniraka lehilahy hialoha azy Izy; Josefa namidy ho andevo;

¹⁸Nampijaliny tamin'ny fatorana ny tongony; Nogadrany vy izy.

¹⁹Mandra-pahatongan'ny fotoana hahatanterahan'ny teniny; Nizaha toetra azy ny tenin'i Jehovah.

²⁰Naniraka ny mpanjaka hamaha azy, Eny, ny mpanapaka ny vahoaka, mba handefa azy.

²¹Nanao azy ho tompon'ny tranony izy Sy ho mpanapaka ny fananany rehetra,

²²Mba hamatotra ny mpanapaka araka ny sitrapony, Sy hampianatra fahendrena ny loholony.

²³Ary Isiraely nankany Egypta; Eny, Jakoba nivahiny tany amin'ny tanin'i Hama.

²⁴Dia nahamaro ny taranaky ny olony ho be indrindra Izy ka nampahery azy noho ny fahavalony.

²⁵Nampiova ny fon'ireny hankahala ny olony Izy Sy hihendry ny mpanompony.

²⁶Naniraka an'i Mosesy mpanompony Sy Arona izay nofidiny Izy.

²⁷Ary izy ireo nanao ny famantarany teo aminy Sy fahagagana tany amin'ny tanin'i Hama.

²⁸Nahatonga aizina Izy ka nahamaizina; Ary tsy nandà ny teniny izy ireo.

²⁹Nahatonga ny ranony ho rà Izy Ka nahafaty ny hazandranony.

³⁰Nisy sahona betsaka ny taniny, Eny, na dia hatrao an-trano fandrian'ny mpanjakany aza.

³¹Niteny Izy, dia tonga ny lalitra betsaka Sy ny moka teny amin'ny faritaniny rehetra.

³²Nahatonga havandra ho solon'ny ranonorana Izy Sy afo midedadeda teny amin'ny taniny.

³³Namely ny voalobony sy ny aviaviny Izy Ka nanapatapaka ny hazo teo amin'ny taniny.

³⁴Niteny Izy, dia tonga ny valala Sy ny sompanga tsy hita isa;

³⁵Dia nihinana ny zava-maitso rehetra teny amin'ny taniny ireny Ka nandany ny vokatry ny taniny.

³⁶Ary namely ny lahimatoa rehetra tany amin'ny taniny Izy, Dia ny voalohan'ainy rehetra.

³⁷Ary dia nitondra ny olony nivoaka Izy sady nampahazo azy volafotsy sy volamena; Ary tsy nisy nangozohozo na dia iray akory aza tamin'ny fireneny.

³⁸Faly Egypta tamin'ny nahalasanany; Fa efa nahazo azy ny fahatahorana ireo.

³⁹Namelatra rahona ho fialokalofana Izy Ary afo ho fanazavana nony alina.

⁴⁰Nangataka izy ireo, dia nahatonga papelika Izy, Ary mofon-danitra no namokisany azy.

⁴¹Nanokatra ny vatolampy Izy, dia nigororoana ny rano Ka nandriaka tamin'ny tany maina ho renirano.

⁴²Fa nahatsiaro ny teniny masina Sy Abrahama mpanompony Izy,

⁴³Dia nitondra ny olony nivoaka tamin'ny fifaliana Izy Ary ny voafidiny tamin'ny fihobiana;

⁴⁴Ka dia nanome azy ny tanin'ny jentilisa Izy; Ary nandova ny vitan'ny firenena maro ireny,

⁴⁵Mba hitandremany ny didiny, Sy hankatoavany ny lalàny. Haleloia.