Read Malagasy Salamo 106 Bible Online

Salamo 106 - Malagasy bible

Salamo 106

¹Haleloia. Miderà an'i Jehovah, fa tsara Izy, Fa mandrakizay ny famindram-pony.

²Iza no mahalaza ny asa lehibe ataon'i Jehovah, Na mahatonona ny fiderana Azy rehetra?

³Sambatra izay mitandrina ny mety Ka manao ny marina mandrakariva.

⁴Jehovah ô, tsarovy aho araka ny fankasitrahanao ny olonao; Vangio amin'ny famonjenao aho,

⁵Hahitako ny soa azon'ny voafidinao, Hifaliako amin'ny fifalian'ny firenenao, Hiravoravoako miaraka amin'ny lovanao.

⁶Efa nanota izahay mbamin'ny razanay, Efa nanao izay meloka sy ratsy izahay.

⁷Ny razanay tany Egypta tsy mba nandinika ny fahagagana nataonao; Tsy mba nahatsiaro ny habetsahan'ny famindram-ponao ireny, Fa niodina teo amoron-dranomasina, Dia teo amoron'ny Ranomasina Mena

⁸Kanefa namonjy azy ihany Izy noho ny anarany, Mba hampahafantarany ny asany lehibe.

⁹Dia noteneniny mafy ny Ranomasina Mena, ka tonga maina iny; Ary nitondra azy nita ny rano lalina tahaka ny efitra Izy,

¹⁰Namonjy azy tamin'ny tanan'ny mpandrafy Izy Ary nanavotra azy tamin'ny tanan'ny fahavalo.

¹¹Dia nosaronan'ny rano kosa ny rafiny. Ka tsy nisy niangana na dia iray akory aza.

¹²Dia nino ny teniny izy Ka nihira ny fiderana Azy.

¹³Nalaky nanadino ny asany izy ka tsy niandry ny saina hatolony,

¹⁴Fa fatra-pila izy tany an-efitra, Sady naka fanahy an'Andriamanitra tany an-tany foana.

¹⁵Dia nomeny azy izay nilainy, Kanefa nampahahiaziny kosa izy.

¹⁶Dia nialona an'i Mosesy tany an-toby Izy ireo Sady nialona an'i Arona, olo-masin'i Jehovah.

¹⁷Nisokatra ny tany, dia nitelina an'i Datana Ka nanarona ny antokon'i Abìrama.

¹⁸Dia nisy afo nirehitra tamin'ny antokony; Lelafo no nandoro ny ratsy fanahy.

¹⁹Nanao ombilahy kely tany Horeba izy Ka niankohoka teo anoloan'ny sarin-javatra an-idina.

²⁰Ary ny voninahiny dia natakalony Sarin'ny omby homana ahitra.

²¹Nohadinoiny Andriamanitra, Mpamonjy azy, Izay efa nanao zava-dehibe tany Egypta,

²²Dia fahagagana tany amin'ny tanin'i Hama sy zava-mahatahotra teo amin'ny Ranomasina Mena.

²³Ary nikasa handringana azy Izy, Raha tsy Mosesy voafidiny no nandroso hijoro tamin'ny banga teo anatrehany hampiala ny fahatezerany mba tsy handringanany azy.

²⁴Ary nanamavo ny tany mahafinaritra ireo Sady tsy mba nino ny teniny,

²⁵Fa nimonomonona tany an-dainy Ka tsy nihaino ny feon'i Jehovah.

²⁶Dia nanandratra ny tànany taminy Izy, Fa hampiampatrampatra azy any an-efitra

²⁷Ary ny taranany kosa any amin'ny jentilisa, Ary hampihahakahaka azy any amin'ny tany maro Izy.

²⁸Nikambana tamin'i Bala-peora ireo ka nihinana ny fanatitra ho an'ny maty,

²⁹Dia nampahatezitra an'i Jehovah tamin'ny nataony, Ka dia namely azy tampoka ny areti-mandringana.

³⁰Fa nitsangana nandroso Finehasa ka nanao fitsarana; Dia nitsahatra ny areti-mandringana.

³¹Ary nisaina ho fahamarinany izany Hatramin'ny taranaka fara mandimby mandrakizay.

³²Nampahatezitra an'i Jehovah teo anilan'ny ranon'i Meriba ireo, Ka nisy nanjo an'i Mosesy noho ny nataon'ireo;

³³Fa niodina tamin'ny Fanahin'i Jehovah ireo, ka dia nihoa-bava Mosesy.

³⁴Tsy naringany ny firenena Izay nasain'i Jehovah naringany;

³⁵Fa nifangaro tamin'ny jentilisa izy Ka nianatra ny fanaony,

³⁶Dia nanompo ny sampiny izy, Ka dia nody fandrika ho azy izany.

³⁷Namono ny zananilahy sy ny zananivavy ho fanatitra ho an'ny demonia ireo;

³⁸Eny, nandatsaka rà marina izy, Dia ny ran'ny zananilahy sy ny zananivavy, Izay novonoiny ho fanatitra ho an'ny sampin'i Kanana; Ka dia nametaveta ny tany tamin'ny rà izy.

³⁹Ary naloto tamin'ny asany izy Ary nahatonga azy ho mijangajanga ny nataony.

⁴⁰Dia nirehitra tamin'ny olony ny fahatezeran'i Jehovah, Ka nataony ho zava-betaveta ny lovany.

⁴¹Dia nanolotra azy teo an-tànan'ny jentilisa Izy, Ka izay nankahala azy no nanapaka azy.

⁴²Ary nampahory azy ny fahavalony, Ka naetry tambanin'ny tànany izy.

⁴³Matetika Izy no nahafaka azy; Fa ireo kosa niodina taminy ihany araka ny fisainany Ka nihalevona noho ny helony.

⁴⁴Kanefa nijery ny fahoriany ihany Izy. Raha nandre ny fitarainany;

⁴⁵Dia nahatsiaro ny fanekeny Izy Ka nanenina araka ny haben'ny famindram-pony.

⁴⁶Dia nataony nahita famindram-po ireny Tamin'izay rehetra namabo azy.

⁴⁷Vonjeo izahay, ry Jehovah Andriamanitray ô, Ka angòny avy amin'ny jentilisa, Mba hisaoranay ny anaranao masina Sy hifalianay amin'ny fiderana Anao.

⁴⁸Isaorana anie Jehovah Andriamanitry ny Isiraely, hatramin'ny taloha indrindra ka mandrakizay; Ary aoka ny olona rehetra hanao hoe: Amena! Haleloia.