Read Malagasy Salamo 107 Bible Online

Salamo 107 - Malagasy bible

Salamo 107

¹Miderà an'i Jehovah, fa tsara Fa mandrakizay ny famindram-pony.

²Aoka hanao izany ny navotan'i Jehovah, Dia izay navotany ho afa-ka tamin'ny tanan'ny fahavalo,

³Sy nangoniny avy tany amin'ny tany maro, Dia avy tany atsinanana sy andrefana ary tany avaratra sy tany amin'ny ranomasina.

⁴Nirenireny tany an-efitra ireny ka nanavatsava tany an-tany foana, Ary tsy nahita tanàna honenana.

⁵Noana sy nangetaheta izy, Sady reraka ny ainy tao anatiny,

⁶Dia nitaraina tamin'i Jehovah ireo, raha ory, Ka novonjeny tamin'ny fahatereny;

⁷Dia nitondra azy tamin'ny lalana mahitsy Izy, Mba hankanesany any amin'izay tanàna honenana.

⁸Aoka hidera an'i Jehovah ireo noho ny famindram-pony Sy ny fahagagana ataony amin'ny zanak'olombelona!

⁹Fa mahafa-po ny fanahy mangetaheta Izy, Ary ny fanahy noana dia vokisany soa.

¹⁰Izay nipetraka tao amin'ny maizina sy ny aloky ny fahafatesana, Voafato-pahoriana sy vy,

¹¹Satria nandà ny tenin'Andriamanitra Sady naniratsira ny anatry ny Avo Indrindra;

¹²Dia nampietreny tamin'ny fahoriana ny fony; Ka potraka izy, nefa tsy nisy hamonjy;

¹³Dia nitaraina tamin'i Jehovah ireo, raha ory, Ka novonjeny tamin'ny fahatereny.

¹⁴Nitondra azy nivoaka avy tao amin'ny maizina sy ny aloky ny fahafatesana Izy, Ary notosany ny fatorany.

¹⁵Aoka hidera an'i Jehovah ireo noho ny famindram-pony Sy ny fahagagana ataony amin'ny zanak'olombelona!

¹⁶Fa nanorotoro ny varavarana varahina Izy, Ary ny hidy vy nohenteriny.

¹⁷Mitondra fahoriana ny adala noho ny fahadisoany sy ny helony:

¹⁸Nahamonamonaina azy ny hanina rehetra; Ary nanakaiky ny vavahadin'ny fahafatesana izy.

¹⁹Dia nitaraina tamin'i Jehovah ireo, raha ory, Ka novonjeny tamin'ny fahatereny.

²⁰Nandefa ny teniny Izy mba hahasitrana azy Ary nanafaka azy tamin'ny longoa nianjerany.

²¹Aoka hidera an'i Jehovah ireo noho ny famindram-pony Sy ny fahagagana ataony amin'ny zanak'olombelona!

²²Ary aoka hanatitra fanati-pisaorana izy Sy hilaza ny asany amin'ny fihobiana.

²³Izay midina any an-dranomasina ka mandeha an-tsambo Sy manao raharaha any amin'ny rano lehibe

²⁴No mahita ny asan'i Jehovah Sy ny fahagagana ataony amin'ny rano lalina.

²⁵Fa niteny Izy ka nanangana rivotra mahery, Izay nampisondrotra ny onjan-drano;

²⁶Niakatra hatramin'ny lanitra ny olona, ary nidina hatramin'ny lalina; Ny fanahiny levona noho ny fahoriana.

²⁷Nisangodingodina ireo sady nivembena toy ny mamo, Ka dia very ny sainy rehetra.

²⁸Dia nitaraina tamin'i Jehovah ireo, raha ory, Ka nampiala azy tamin'ny fahatereny Izy.

²⁹Nanony ny rivotra mahery Izy, Ka nitsahatra ny onjan-drano.

³⁰Dia faly ireo, satria nitsahatra izany; Ary nentiny ho amin'ny fitodiana niriny izy.

³¹Aoka hidera an'i Jehovah ireo noho ny famindram-pony Sy ny fahagagana ataony amin'ny zanak'olombelona!

³²Ary aoka hanandratra Azy eo amin'ny fiangonan'ny olona izy Ka hidera Azy eo amin'ny fipetrahan'ny loholona.

³³Mampody ny ony ho efitra Izy Ary ny loharano ho tany mangentana,

³⁴Ny tany mahavokatra ho tanin-tsira, Noho ny faharatsian'ny mponina eo.

³⁵Mampody ny efitra ho rano monina Izy Sy ny tany maina ho loharano,

³⁶Ary amponeniny eo izay noana, Mba hanamboatra tanana honenana;

³⁷Ary hamafy eny an-tsaha izy Sady hanao tanim-boaloboka Ka hahazo vokatra be.

³⁸Dia mitahy azy Izy mba hitomboany betsaka, Ka tsy avelany hihavitsy ny biby fiompiny.

³⁹Fa mihakely sy mietry indray izy Noho ny fampahoriana sy ny loza ary ny alahelo.

⁴⁰Mampidina fanamavoana amin'ny mpanapaka Jehovah Ka mampirenireny azy any an-efitra tsy misy lalana;

⁴¹Fa manandratra ny malahelo ho afa-pahoriana kosa Izy,Ka mahamaro mianakavy azy toy ny ondry andiany.

⁴²Hahita izany ny marina ka ho faly; Fa hihombom-bava kosa ny ratsy fanahy rehetra.

⁴³Izay hendry dia aoka hahafantatra izany Ka hahalala ny famindram-pon'i Jehovah.