Read Malagasy Salamo 108 Bible Online

Salamo 108 - Malagasy bible

Salamo 108

¹Tonon-kira. Salamo nataon'i Davida. Andriamanitra ô, tafatoetra ny foko; Ny fanahiko no hihira sy hankalaza.

²Mifohaza, ry valiha sy lokanga; hifoha maraina koa aho.

³Hidera Anao eny amin'ny firenena maro aho, Jehovah ô, Ary hankalaza Anao eny amin'ny jentilisa.

⁴Fa lehibe mihoatra ny lanitra ny famindram-ponao; Ary mipaka eny amin'ny rahona ny fahamarinanao.

⁵Misandrata any ambonin'ny lanitra Hianao, Andriamanitra ô; Ary aoka ho etỳ ambonin'ny tany rehetra ny voninahitrao.

⁶Mba hahafaka ny malalanao, Dia vonjeo amin'ny tananao ankavanana aho, ka valio.

⁷Andriamanitra niteny tamin'ny fahamasinany hoe: Hifaly Aho ka hizara an'i Sekema, Ary ny lohasahan'i Sokota horefesiko;

⁸Ahy Gileada, Ahy Manase; Ary aron'ny lohako Efraima; Tehim-panjakako Joda;

⁹Tavindranoko fanasana Moaba; Edoma no hanipazako ny kapako; noho ny amin'i Filistia ho hihobiako.

¹⁰Iza no hitondra ahy ho any an-tanàna mafy? Iza no hitarika ahy ho any Edoma?

¹¹Tsy Hianao va no efa nanary anay, Andriamanitra ô, Sady tsy mivoaka miaraka amin'ny miaramilanay, Andriamanitra ô?

¹²Vonjeo amin'ny fahavalo izahay; Fa zava-poana ny famonjena ataon'ny olona.

¹³Andriamanitra no haharezan-tsika; Fa Izy no hanitsakitsaka ny fahavalontsika.