Read Malagasy Salamo 109 Bible Online

Salamo 109 - Malagasy bible

Salamo 109

¹Ho an'ny mpiventy hira. Salamo nataon'i Davida. RY Andriamanitra fidèrako ô, aza mangina Hianao,

²Fa nisoka-bava ny ratsy fanahy sy ny mpamitaka hamely ahy; Niteny ahy tamin'ny lela mandainga izy.

³Teny fankahalana no nanodidinany ahy; Ary niady tamiko tsy ahoan-tsy ahoana izy.

⁴Ny fitiavako dia valiany fandrafiana; Fa izaho kosa dia mivavaka.

⁵Ny soa nataoko novaliany ratsy, Ary ny fitiavako novaliany fankahalana.

⁶Anendreo olona ratsy fanahy hanapaka azy; Ary aoka hisy mpanohitra hitsangana eo an-kavanany.

⁷Raha hotsaraina izy, dia aoka ho meloka, Ary aoka ny fivavahany ho tonga fahotana.

⁸Aoka ho vitsy ny androny; Ary aoka ho lasan'olon-kafa ny anjara raharahany.

⁹Aoka ho kamboty ny zanany; Ary aoka ho mpitondratena ny vadiny

¹⁰Aoka hirenireny mangataka ny zanany, Ary aoka hiremby lavitra ny tranony efa rava izy.

¹¹Aoka ny mpampanàna vola hamandrika izay rehetra ananany; Ary aoka ny olon-kafa hifaoka ny vokatry ny asany.

¹²Aoka tsy hisy haharitra hamindra fo aminy, Na hiantra ny zanany kamboty.

¹³Aoka ho fongora ny taranany; Ary aoka hovonoina amin'ny taranaka mandimby ny anarany.

¹⁴Aoka hotsarovan'i Jehovah ny helo-drainy; Ary aoka tsy hovonoina ny helo-dreniny.

¹⁵Aoka ho eo anatrehan'i Jehovah mandrakariva izany, Ary hofoanany tsy ho eo ambonin'ny tany anie ny fahatsiarovana azy.

¹⁶Satria tsy mba nahatsiaro hamindra fo izy, Fa nanenjika ny ory sy ny malahelo Ary ny reraka am-po mba hahafaty azy;

¹⁷Tia ozona izy, ka nanody azy izany; Tsy tia indrafo izy, ka nanalavitra azy izany.

¹⁸Nitafy ozona tahaka ny lambany izy, Ka niditra tao an-kibony tahaka ny rano izany, Ary tao amin'ny taolany tahaka ny diloilo;

¹⁹Dia aoka ho tahaka ny lamba itafiany izany, Ary ho fisikinana isikinany mandrakariva.

²⁰Izany no famaliana avy amin'i Jehovah ho an'ny mpanohitra ahy, Dia izay manendrikendrika ahy.

²¹Fa Hianao, Jehovah Tompo ô, miasà ho ahy noho ny anaranao; Vonjeo aho, fa tsara ny famindram-ponao.

²²Fa mahantra sy malahelo aho, Ary ny foko dia voatsindrona ato anatiko.

²³Lasa tahaka ny aloka mihelina aho; Roahina tahaka ny valala aho.

²⁴Efa malemy ny lohaliko noho ny fifadian-kanina; Ary efa mihena ny hatavin'ny nofoko.

²⁵Ary izaho dia tonga fandatsan'ireny; Mijery ahy izy ka mihifikifi-doha.

²⁶Ampio aho Jehovah Andriamanitro ô; Vonjeo araka ny famindram-ponao aho;

²⁷Ary aoka ho fantany fa tananao izany; Hianao, Jehovah ô, no nanao izany.

²⁸Manozona izy ireo, fa Hianao kosa mitahy; Mitsanga-menatra izy, fa mifaly kosa ny mpanomponao.

²⁹Mitafy henatra ny fahavaloko Ka misaron-kenatra tahaka ny lamba.

³⁰Hidera an'i Jehovah indrindra amin'ny vavako aho; Eny, eo amin'ny olona maro no hiderako Azy.

³¹Fa mitsangana eo an-kavanan'ny malahelo Izy Mba hamonjy azy amin'izay manameloka ny fanahiny.