Read Malagasy Salamo 115 Bible Online

Salamo 115 - Malagasy bible

Salamo 115

¹Jehovah ô, aza izahay, aza izahay no omena voninahitra, Fa ny anaranao ihany, Noho ny famindram-ponao sy ny fahamarinanao.

²Nahoana ny jentilisa no manao hoe: Aiza izay Andriamaniny?

³Nefa any an-danitra Andriamanitsika; Efa nanao izay sitrapony rehetra Izy.

⁴Volafotsy sy volamena ny sampin'ireny, Asan'ny tanan'olona:

⁵Manam-bava izy. fa tsy miteny; Mana-maso izy, fa tsy mahita;

⁶Manan-tsofina izy, fa tsy mandre; Manana orona izy, fa tsy manimbolo:

⁷Manan-tanana izy, fa tsy mandray; Manan-tongotra izy, fa tsy mandeha; Ary tsy mahaloa-peo ny tendany.

⁸Ho tahaka azy izay manao azy Sy izay rehetra matoky azy.

⁹Ry Isiraely ô, matokia an'i Jehovah; Heriny sy ampingany Izy.

¹⁰Ry taranak'i Arona ô, matokia an'i Jehovah; Heriny sy ampingany Izy.

¹¹Hianareo izay matahotra an'i Jehovah, matokia an'i Jehovah; Heriny sy ampingany Izy.

¹²Jehovah mahatsiaro ka mitahy antsika; Hitahy ny taranak'i Isiraely Izy; Hitahy ny taranak'i Arona Izy;

¹³Hotahiny izay matahotra an'i Jehovah, Na ny kely na ny lehibe.

¹⁴Jehovah anie hampitombo anareo, Dia ianareo mbamin'ny zanakareo.

¹⁵Hitahy anareo anie Jehovah, Mpanao ny lanitra sy ny tany.

¹⁶Ny lanitra dia an'i Jehovah: fa ny tany nomeny ho an'ny zanak'olombelona.

¹⁷Ny maty tsy mba hidera an'i Jehovah. Na izay midina any amin'ny mangingina;

¹⁸Fa izahay hisaotra an'i Jehovah Hatramin'izao ka ho mandrakizay. Haleloia.