Read Malagasy Salamo 116 Bible Online

Salamo 116 - Malagasy bible

Salamo 116

¹Izaho tia an'i Jehovah, satria efa nandre Ny feon'ny fifonako Izy.

²Satria efa nanongilana ny sofiny tamiko Izy, Dia hiantso aho, raha mbola velona koa.

³Nihodidina tamiko ny famatoran'ny fahafatesana, Ary nahazo ahy ny fahorian'ny fiainan-tsi-hita; Nahita fahoriana sy alahelo aho.

⁴Dia niantso ny anaran'i Jehovah hoe aho: Jehovah ô, mifona aminao aho, vonjeo ny fanahiko.

⁵Mamindra fo sy marina Jehovah Eny, miantra Andriamanitsika.

⁶Miaro ny kely saina Jehovah; Reraka aho, dia namonjy ahy Izy.

⁷Miverena ho amin'ny fitsaharanao, ry fanahiko, Fa Jehovah efa nanisy soa anao,

⁸Dia namonjy ny fanahiko tamin'ny fahafatesana Hianao Sy ny masoko tamin'ny ranomaso Ary ny tongotro tamin'ny fahatafintohinana.

⁹Handeha eo anatrehan'i Jehovah Eo amin'ny tanin'ny velona aho.

¹⁰Nino aho; hiteny tokoa aho; Mahantra indrindra aho.

¹¹Hoy izaho tamin'ny fahatairako; Mpandainga ny olona rehetra.

¹²Inona no havaliko an'i Jehovah Noho ny soa rehetra nataony tamiko?

¹³Handray ny kapoaky ny famonjena aho Ka hiantso ny anaran'i Jehovah.

¹⁴Hanefa ny voadiko amin'i Jehovah aho. Eny, eo anatrehan'ny olony rehetra.

¹⁵Zava-dehibe eo imason'i Jehovah Ny fahafatesan'ny olony masina.

¹⁶Indrisy! Jehovah ô, mpanomponao tokoa aho, Eny, mpanomponao sady zanaky ny ankizivavinao; Namaha ny fatorako Hianao.

¹⁷Hianao no haterako fanati-pisaorana, Ary ny anaran'i Jehovah no hantsoiko.

¹⁸Hanefa ny voadiko amin'i Jehovah aho, Eny, eo anatrehan'ny olony rehetra,

¹⁹Dia eo an-kianjan'ny tranon'i Jehovah, Eo afovoanao, ry Jerosalema ô. Haleloia.