Read Malagasy Salamo 118 Bible Online

Salamo 118 - Malagasy bible

Salamo 118

¹Miderà an'i Jehovah, fa tsara Izy; Eny, mandrakizay ny famindram-pony.

²Aoka ny Isiraely hanao hoe: Mandrakizay ny famindram-pony.

³Aoka ny taranak'i Arona hanao hoe: Mandrakizay ny famindram-pony.

⁴Aoka izay matahotra an'i Jehovah hanao hoe: Mandrakizay ny famindram-pony.

⁵Tao an-katerena no niantsoako an'i Jehovah; Dia namaly ahy Jehovah ka nampahalalaka ahy.

⁶Jehovah no miandany amiko, ka tsy hatahotra aho. Inona no azon'ny olona atao amiko?

⁷Jehovah no miandany amiko, sady mamonjy ahy; Ary izaho ho faly hahita ny amin'izay mankahala ahy.

⁸Tsara ny mialoka amin'i Jehovah Noho ny mialoka amin'ny olona.

⁹Tsara ny matoky an'i Jehovah Noho ny matoky ny mpanapaka.

¹⁰Ny firenena rehetra nanodidina ahy; Fa ny anaran'i Jehovah no handringanako azy tokoa;

¹¹Nitangorona tamiko ireny, eny, nitangorona tamiko; Fa ny anaran'i Jehovah no handringanako azy tokoa.

¹²Nanodidina ahy tahaka ny renitantely izy; Voavono tahaka ny afon-tsilo izy; Fa ny anaran'i Jehovah no handringanako azy tokoa.

¹³Nanosika ahy mafy hahalavo ahy ianao; Fa Jehovah no namonjy ahy.

¹⁴Jehovah no heriko sy fiderako. Fa efa famonjena ahy Izy.

¹⁵Ao an-dain'ny marina ny feo mihoby noho ny famonjena; Ny tanana ankavanan'i Jehovah mampiseho hery;

¹⁶Ny tanana ankavanan'i Jehovah dia misandratra; Ny tanana ankavanan'i Jehovah mampiseho hery.

¹⁷Tsy ho faty aho, fa ho velona Ka hitory ny asan'i Jehovah.

¹⁸Nofaizan'i Jehovah mafy aho, Nefa tsy natolony ho amin'ny fahafatesana.

¹⁹Vohay ny vavahadin'ny fahamarinana aho; Hiditra eo aho ka hidera an'i Jehovah.

²⁰Ity no vavahadin'i Jehovah; Ny marina no hiditra eo.

²¹Hidera Anao aho, fa efa namaly ahy Hianao Ka efa famonjena ahy.

²²Ny vato izay nolavin'ny mpanao trano No efa tonga fehizoro Indrindra.

²³Avy tamin'i Jehovah izany Ka mahagaga eo imasontsika.

²⁴Ity no andro nataon'i Jehovah; Hifaly sy ho ravoravo amin'izao isika.

²⁵Mifona aminao aho, Jehovah ô, vonjeo è! Mifona aminao aho, Jehovah ô, ambino è!

²⁶Hotahina anie izay avy amin'ny anaran'i Jehovah; Avy ao an-tranon'i Jehovah no itsofanay rano anareo.

²⁷Andriamanitra Jehovah ka nampahazava antsika; Rohizo kofehy ny fanati-piravoravoana na dia hatreo amin'ny tandroky ny alitara aza.

²⁸Andriamanitro Hianao, ka hidera Anao aho; Eny, Andriamanitro, ka hanandratra Anao aho.

²⁹Miderà an'i Jehovah, fa tsara Izy; Eny, mandrakizay ny famindram-pony.