Read Malagasy Salamo 119 Bible Online

Salamo 119 - Malagasy bible

Salamo 119

¹Sambatra ny mahitsy lalana,Izay mandeha araka ny lalàn'i Jehovah.

²Sambatra izay mitandrina ny teni-vavolombelony Ka mitady Azy amin'ny fo rehetra;

³Eny, Izay tsy manao ratsy. Fa mandeha araka ny lalany.

⁴Hianao namoaka ny didinao Mba hotandremana tsara.

⁵Enga anie ka ho tafatoetra ny lalako Hitandremako ny didinao!

⁶Dia tsy ho menatra aho, Raha mandinika ny didinao rehetra.

⁷Hidera Anao amin'ny hitsim-po aho Amin'ny ianarako ny fitsipikao marina.

⁸Ny didinao no hotandremako; Aza dia mahafoy ahy Hianao.

⁹Inona no hiarovan'ny zatovo ny lalan-kalehany tsy ho voaloto? Ny fitandremana araka ny teninao.

¹⁰Tamin'ny foko rehetra no nitadiavako Anao; Aza avela hivily hiala amin'ny didinao aho.

¹¹Ato am-poko no iraketako ny teninao, Mba tsy hanotako aminao.

¹²Isaorana anie Hianao, Jehovah ô; Ampianaro ahy ny didinao.

¹³Ny molotro no nentiko nilaza Ny fitsipika rehetra naloaky ny vavanao.

¹⁴Ny lalan'ny teni-vavolombelonao no ifaliako, Tahaka ny ifaliako amin'ny harena rehetra.

¹⁵Ny didinao no hosaintsainiko, Ary hodinihiko ny lalanao.

¹⁶Ny didinao no hiravoravoako: Tsy hohadinoiko ny teninao.

¹⁷Asio soa aho mpanomponao, mba ho velona Ka hitandrina ny teninao.

¹⁸Ampahirato ny masoko, mba hahitako Zava-mahagaga ao amin'ny lalànao.

¹⁹Vahiny etỳ an-tany aho; Aza afeninao ahy ny didinao.

²⁰Torotoro ny fanahiko noho ny faniriany Ny fitsipikao mandrakariva.

²¹Voateninao mafy ny mpirehareha, dia ny olom-boaozona, Izay mania miala amin'ny didinao.

²²Esory amiko ny fahafaham-baraka sy ny fanamavoana: Fa efa nitandrina ny teni-vavolombelonao aho.

²³Na dia ny mpanapaka aza dia mipetraka, ka iokoany aho; Izaho mpanomponao misaintsaina ny didinao.

²⁴Ny teni-vavolombelonao koa no firavoravoako, Eny, mpanolo-tsaina ahy izany.

²⁵Miraikitra amin'ny vovoka ny fanahiko; Velomy aho araka ny teninao.

²⁶Ny lalako no nolazaiko, ary namaly ahy Hianao: Ampianaro ahy ny didinao.

²⁷Ampahalalao ahy ny lalan'ny didinao; Dia hoheveriko ny fahagagana nataonao.

²⁸Mipotrapotra-dranomaso aho noho ny alaheloko; Ampaherezo aho araka ny teninao.

²⁹Ny lalan'ny lainga no esory amiko: Ary ny lalànao no anasoavy ahy.

³⁰Ny lalàn'ny fahamarinanao no fidiko; Apetrako eo anatrehako ny fitsipikao.

³¹Mifikitra amin'ny teni-vavolombelonao aho; Jehovah ô, aza avela ho azon-kenatra aho;

³²Ny lalan'ny didinao no ihazakazahako, Fa ampahalalahinao ny foko.

³³Jehovah ô, toroy ny lalan'ny didinao aho; Dia hotandremako hatramin'ny farany izany.

³⁴Omeo fahalalana aho mba hitandrina ny lalànao; Eny, hitandrina azy amin'ny foko rehetra aho.

³⁵Ampandehano amin'ny lalan'ny didinao aho; Fa izany no sitrako.

³⁶Amporisiho ny foko ho amin'ny teni-vavolombelonao, Fa tsy ho amin'ny fieremana.

³⁷Avilio ny masoko tsy hijery zava-poana; Velomy amin'ny lalanao aho.

³⁸Tovy ny teninao amin'ny mpanomponao, Izay matahotra Anao indrindra.

³⁹Esory ny fahafaham-baraka. izay atahorako; Fa tsara ny fitsipikao.

⁴⁰Indro, manina ny didinao aho, Velomy amin'ny fahamarinanao.

⁴¹Aoka ho tonga amiko ny famindram-ponao, Jehovah ô, Dia ny famonjenao, araka ny teninao.

⁴²Dia hamaly izay miteny ratsy ahy aho, Satria matoky ny teninao.

⁴³Ary aza dia esorina amin'ny vavako ny teny marina; Fa miandry ny fitsaranao aho.

⁴⁴Dia hitandrina ny lalinao mandrakariva aho, Dia mandrakizay doria.

⁴⁵Ary handeha amin'ny malalaka aho; Fa ny didinao no tadiaviko.

⁴⁶Hilaza ny teni-vavolombelonao eo anatrehan'ireo mpanjaka aho Ka tsy ho menatra.

⁴⁷Ary hiravoravo amin'ny didinao aho Satria tiako ireny.

⁴⁸Hasandratro ny tanako ho amin'ny didinao satria tiako ireny: Hosaintsainiko ny didinao.

⁴⁹Tsarovy ny teny natao tamiko mpanomponao Izay nampanantenanao ahy.

⁵⁰Izao no mampionona ahy amin'ny fahoriako; Ny teninao no mamelona ahy.

⁵¹Ny mpirehareha maniratsira ahy: Tsy mba mivily miala amin'ny lalànao aho.

⁵²Mahatsiaro ny fitsipikao izay hatramin'ny taloha aho, Jehovah ô, Dia mionona aho.

⁵³Fahatezerana mirehitra no nahazo ahy Noho ny amin'ny ratsy fanahy izay mahafoy ny lalànao.

⁵⁴Ny didinao no ataoko an-kira Ao amin'ny trano fivahiniako.

⁵⁵Mahatsiaro ny anaranao nony alina aho, Jehovah ô, Ka mitandrina ny lalànao.

⁵⁶Izao no ahy: Mitandrina ny didinao aho.

⁵⁷Anjarako Jehovah; Minia mitandrina ny teninao aho.

⁵⁸Mifona aminao amin'ny foko rehetra aho: Mamindrà fo amiko araka ny teninao.

⁵⁹Mihevitra ny lalako aho Ka mamerina ny tongotro ho amin'ny teni-vavolombelonao.

⁶⁰Mandeha faingana aho ka tsy mitaredretra, Amin'ny fitandremana ny didinao.

⁶¹Nihodidina tamiko ny famato-ran'ny ratsy fanahy; Tsy mba nanadino ny lalànao aho.

⁶²Mamatonalina no hifohazako hidera Anao Noho ny fitsipikao marina.

⁶³Naman'izay rehetra matahotra Anao aho Sy naman'izay mitandrina ny didinao.

⁶⁴Jehovah ô, henika ny famindram-ponao ny tany; Ampianaro ahy ny didinao.

⁶⁵Jehovah ô, efa nasianao soa ny mpanomponao, Araka ny teninao.

⁶⁶Ampianaro fahafantarana tsara sy fahalalana aho, Fa matoky ny didinao aho.

⁶⁷Fony tsy mbola azom-pahoriana aho, dia naniasia; Fa ankehitriny dia mitandrina ny teninao aho.

⁶⁸Sady tsara Hianao no Mpanao ny tsara; Ampianaro ahy ny didinao.

⁶⁹Namoron-dainga hamelezana ahy ny mpirehareha; Amin'ny foko rehetra no itandremako ny didinao.

⁷⁰Matavy tahaka ny menaka ny fony; Fa izaho kosa, dia ny lalànao no iravoravoako.

⁷¹Soa ihany aho nampahorina, Mba hianarako ny didinao.

⁷²Ny lalàn'ny vavanao no mahatsara ahy Mihoatra noho ny volamena sy ny volafotsy tsy omby arivo.

⁷³Ny tananao nanao ahy sy namboatra ahy; Ampianaro aho, mba hianarako ny didinao.

⁷⁴Izay matahotra Anao hahita ahy ka ho faly; Fa ny teninao no andrasako.

⁷⁵Fantatro, Jehovah ô, fa marina ny fitsaranao. Ary ny fahamarinanao no nampahorianao ahy.

⁷⁶Ny famindram-ponao anie no hampiononana ahy Araka ny teninao tamin'ny mpanomponao.

⁷⁷Aoka ho tonga amiko ny fiantranao, mba ho velona aho; Fa ny lalànao no firavoravoako.

⁷⁸Aoka ho menatra ny mpirehareha, fa nampahory ahy tsy ahoan-tsy ahoana izy; Izaho hisaintsaina ny didinao.

⁷⁹Aoka hiverina amiko izay matahotra Anao Sy izay mahalala ny teni-vavolombelonao.

⁸⁰Aoka ho marina tsara ny foko amin'ny fitanana ny didinao, Mba tsy ho menatra aho.

⁸¹Ritra ny aiko, satria manina ny famonjenao aho; Ny teninao no andrasako.

⁸²Pahina ny masoko miandry ny teninao, Ka hoy izaho: Rahoviana no hampionona ahy Hianao?

⁸³Fa tahaka ny siny hoditra ao amin'ny setroka aho. Nefa ny didinao tsy mba hadinoiko.

⁸⁴Hoatrinona no andron'ny mpanomponao? Rahoviana no hanao fitsarana amin'izay manenjika ahy Hianao?

⁸⁵Efa nanao longoa hianjerako ny mpirehareha, Dia izay tsy manaraka ny lalànao.

⁸⁶Marina ny didinao rehetra; Manenjika ahy tsy ahoan-tsy ahoana ireny; vonjeo aho.

⁸⁷Saiky laniny teo amin'ny tany aho, Kanefa tsy mba mahafoy ny didinao.

⁸⁸Velomy aho araka ny famindram-ponao; Dia hitandrina ny teni-vavolombelona naloaky ny vavanao aho.

⁸⁹Ho mandrakizay, Jehovah ô, No nanorenanao any an-danitra ny teninao.

⁹⁰Hihatra amin'ny taranaka fara-mandimby ny fahamarinanao; Efa nampitoetra ny tany Hianao, ka, indro, mitoetra izy.

⁹¹Hanefa ny fitsaranao no itoerany mandraka androany; Fa mpanomponao ny zavatra rehetra.

⁹²Raha tsy ny lalànao no niravoravoako, Dia maty tamin'ny fahoriako aho.

⁹³Tsy hohadinoiko mandrakizay ny didinao; Fa ireny no amelomanao ahy.

⁹⁴Anao aho, vonjeo aho; Fa ny didinao no tadiaviko.

⁹⁵Miandry ahy ny ratsy fanahy mba hahafaty ahy; Mandinika ny teni-vavolombelonao aho

⁹⁶Efa hitako fa manam-pahataperana avokoa ny tanteraka rehetra; Malalaka indrindra ny didinao.

⁹⁷Endrey ny fitiavako ny lalànao! Fisaintsainako mandrakariva izany.

⁹⁸Ny didinao mampahahendry ahy mihoatra noho ny fahavaloko, Satria ato amiko mandrakizay ireny.

⁹⁹Hendry noho ny mpampianatra ahy rehetra aho, Satria ny teni-vavolombelonao no fisaintsainako.

¹⁰⁰Hendry noho ny anti-panahy aho, Satria ny didinao no notandremako.

¹⁰¹Efa narovako ny tongotro tsy ho amin'izay lalàn-dratsy, Mba hitandremako ny teninao.

¹⁰²Tsy mba miala amin'ny fitsipikao aho; Fa Hianao no mampianatra ahy.

¹⁰³Endrey ny hamamin'ny teninao, raha andramako! Mihoatra noho ny tantely ato am-bavako aza!

¹⁰⁴Ny didinao no nahazoako fahalalana; Izany no ankahalako ny lalam-pitaka rehetra.

¹⁰⁵Fanilon'ny tongotro Sy fanazavana ny lalako ny teninao.

¹⁰⁶Efa nianiana aho fa hitandrina ny fitsipikao marina, Ka nefaiko izany.

¹⁰⁷Ampahorina indrindra aho; Jehovah ô, velomy aho araka ny teninao.

¹⁰⁸Jehovah ô, aoka anie mba hankasitrahanao ny fanati-tsitrapo aloaky ny vavako, Ary ampianaro ahy ny fitsipikao.

¹⁰⁹An-tenda ihany ny aiko mandrakariva; Kanefa tsy manadino ny lalànao aho.

¹¹⁰Ny ratsy fanahy mamela-pandrika haningotra ahy; Kanefa tsy mania miala amin'ny didinao aho.

¹¹¹Efa noraisiko ho lovako mandrakizay ny teni-vavolombelonao, Satria fifalian'ny foko izany.

¹¹²Apetrako ny foko hankatò ny didinao Mandrakizay hatramin'ny farany.

¹¹³Halako ny mpiroa saina; Fa ny lalànao no tiako.

¹¹⁴Fiereko sy ampingako Hianao; Ny teninao no andrasako.

¹¹⁵Mialà amiko ianareo mpanao ratsy, Mba hitandremako ny didin'Andriamanitro.

¹¹⁶Tohàny aho araka ny teninao, mba ho velona, Ary aoka tsy ho menatra amin'ny fanantenako aho.

¹¹⁷Tohàny aho mba ho voavonjy, Ka ho faly hijery ny didinao mandrakariva.

¹¹⁸Ataonao tsinontsinona izay rehetra mania amin'ny didinao; Fa famitahan-tena ihany ny laingany.

¹¹⁹Efa nataonao fanary tain-drendrika ny ratsy fanahy rehetra amin'ny tany; Izany no itiavako ny teni-vavolombelonao.

¹²⁰Mipararetra ny nofoko ny fahatahorana Anao, Ary matahotra ny fitsaranao aho.

¹²¹Manaraka ny fitsipika sy ny fahamarinana aho; Aza manolotra ahy ho amin'ny mpampahory ahy.

¹²²Iantohy mba ho soa ny mpanomponao; Aza avela hampahory ahy ny mpirehareha.

¹²³Pahina ny masoko miandry ny famonjenao. Sy ny tenin'ny fahamarinanao.

¹²⁴Ataovy amin'ny mpanomponao araka ny famindram-ponao; Ary ampianaro ahy ny didinao.

¹²⁵Mpanomponao aho, ka ampianaro, Mba ho fantatro ny teni-vavolombelonao.

¹²⁶Efa andro tokony hampisehoan'i Jehovah ny heriny izao; Fa nandika ny lalànao ny olona.

¹²⁷Izany no itiavako ny didinao mihoatra noho ny volamena, Eny, noho ny tena volamena aza.

¹²⁸Izany no iheverako ny didy rehetra ho marina avokoa; Halako ny lalam-pitaka rehetra;

¹²⁹Mahagaga ny teni-vavolombelonao, Ka dia mitandrina azy ny fanahiko.

¹³⁰Mahazava ny famoahana ny hevitry ny teninao Ka manome fahalalana ho an'ny kely saina.

¹³¹Mitanatana vava aho ka mihanahana, Fa ny didinao no iriko.

¹³²Todiho aho, ka mamindrà fo amiko, Araka ny tokony ho anjaran'izay tia ny anaranao.

¹³³Ampitoero eo amin'ny teninao ny diako; Ary aza avela hanapaka ahy izay mety ho faharatsiana.

¹³⁴Vonjeo amin'ny fampahorian'ny olona Dia hitandrina ny didinao.

¹³⁵Ampamirapirato amin'ny mpanomponao ny tavanao; Ary ampianaro ahy ny didinao.

¹³⁶Rano mandriaka no mijononoka amin'ny masoko Noho ny tsi-fitandreman'ny olona ny lalànao.

¹³⁷Marina Hianao, Jehovah ô, Ary mahitsy ny fitsipikao.

¹³⁸Efa voadidinao amin'ny fahamarinana Sy ny fahatokiana indrindra ny teni-vavolombelonao.

¹³⁹Efa maharitra aina ahy ny fahasaro-piaroko, Satria nanadino ny teninao ny mpandrafy ahy.

¹⁴⁰Voazaha toetra tamin'ny memy ny teninao, Ka dia tian'ny mpanomponao.

¹⁴¹Kely aho ka natao ho tsinontsinona; Nefa tsy hadinoiko ny didinao.

¹⁴²Ny fahamarinanao dia fahamarinana mandrakizay, Ary marina ny lalànao.

¹⁴³Fahoriana sy fahaterena no nahazo ahy; Ny didinao no firavoravoako.

¹⁴⁴Ny fahamarinan'ny teni-vavolombelonao dia mandrakizay; Ampianaro aho, mba ho velona.

¹⁴⁵Ny foko rehetra no nentiko nitaraina hoe: Valio aho, Jehovah ô; Ny didinao no hotandremako;

¹⁴⁶Nitaraina taminao aho nanao hoe Vonjeo aho, Dia hitandrina ny didinao.

¹⁴⁷Raha mbola tsy nazavaratsy aza ny andro, dia nitaraina aho; Ny teninao no andrasako.

¹⁴⁸Nialoha ny fiambenana amin'ny alina ny masoko, Mba hisaintsainako ny teninao.

¹⁴⁹Henoy ny feoko araka ny famindram-ponao, Jehovah ô, Velomy aho araka ny fitsipikao.

¹⁵⁰Efa mby akaiky izay fatra-panaraka ny ratsy, Dia izay manalavitra ny lalànao.

¹⁵¹Akaiky Hianao, Jehovah ô; Ary marina ny didinao rehetra.

¹⁵²Efa fantatro ela tamin'ny teni-vavolombelonao Fa nampitoerinao ho mandrakizay ireny.

¹⁵³Jereo ny fahoriako, ka vonjeo aho; Fa ny lalànao tsy mba hadinoiko.

¹⁵⁴Soloy vava aho, ka vonjeo; Velomy aho araka ny teninao.

¹⁵⁵Lavitra ny ratsy fanahy ny famonjena, Satria ny didinao tsy tadiaviny.

¹⁵⁶Lehibe ny antranao, Jehovah ô; Velomy aho araka ny fitsipikao.

¹⁵⁷Maro ny mpanenjika sy mpandrafy ahy; Tsy mba niala tamin'ny teni-vavolombelonao aho.

¹⁵⁸Mijery ny mpivadika aho, ka maharikoriko ahy ireny, Dia izay tsy nitandrina ny teninao.

¹⁵⁹He ny fitiavako ny didinao! Jehovah ô, velomy aho araka ny famindram-ponao.

¹⁶⁰Fahamarinana no tontalin-kevitry ny teninao; Ary mandrakizay ny fitsipikao marina rehetra.

¹⁶¹Na dia ny mpanapaka aza dia nanenjika ahy tsy ahoan-tsy ahoana; Nefa ny teninao no atahoran'ny foko.

¹⁶²Faly aho noho ny teninao Tahaka ny mahazo babo be.

¹⁶³Halako ny lainga ka ataoko ho fahavetavetana; Ny lalànao no tiako.

¹⁶⁴Impito isan'andro no iderako Anao Noho ny fitsipikao marina.

¹⁶⁵Be fiadanana izay tia ny lalànao, Ary tsy misy mahatafintohina azy.

¹⁶⁶Miandry ny famonjenao aho, Jehovah ô, Ka mankatò ny didinao.

¹⁶⁷Mitandrina ny teni-vavolombelonao ny fanahiko, Ka tiako indrindra izy.

¹⁶⁸Mitandrina ny didinao sy ny teni-vavolombelonao aho; Fa ny lalan-kalehako rehetra dia eo anatrehanao.

¹⁶⁹Aoka anie ho tonga eo anatrehanao ny fitarainako, Jehovah ô; Ampianaro aho araka ny teninao.

¹⁷⁰Aoka anie ho tonga eo anatrehanao ny fifonako; Vonjeo aho araka ny teninao.

¹⁷¹Aoka hiboiboika fiderana ny molotro, Fa ampianarinao ahy ny didinao.

¹⁷²Hihira ny teninao ny lelako, Fa marina ny didinao rehetra.

¹⁷³Aoka anie hamonjy ahy ny tananao; Fa efa nifidy ny didinao aho.

¹⁷⁴Efa manina ny famonjenao aho, Jehovah ô; Ary ny lalànao no firavoravoako.

¹⁷⁵Aoka anie ho velona ny fanahiko ka hidera Anao; Ary aoka anie hamonjy ahy ny fitsaranao.

¹⁷⁶Efa nania aho; tadiavo ny mpanomponao toy ny fitady ondry very; Fa ny didinao tsy mba hadinoiko.