Read Malagasy Salamo 132 Bible Online

Salamo 132 - Malagasy bible

Salamo 132

¹Fihirana fiakarana. Jehovah ô, tsarovy Davida Noho ny fiahiany rehetra,

²Dia ilay nianiana tamin'i Jehovah Sy nivoady tamin'ny Maherin'i Jakoba hoe:

³Tsy mba hiditra ao an-daiko aho, Na hiakatra amin'ny farafara fandriako,

⁴Tsy mba havelako hatory ny masoko, Na ho rendrehana ny hodimasoko,

⁵Mandra-pahitako fitoerana ho an'i Jehovah. Dia fonenana ho an'ny Maherin'i Jakoba.

⁶Indro, nandre azy tany Efrata isika; Nahita azy tao amin'ny saha anaty ala isika.

⁷Aoka hiditra any amin'ny fonenany isika Ka hivavaka eo amin'ny fitoeran-tongony.

⁸Mitsangàna, Jehovah ô, ho amin'ny fitsaharanao, Dia Hianao sy ny fiaran'ny herinao.

⁹Aoka ny mpisoronao hirafy fahamarinana Ary aoka ny olonao masina hihoby.

¹⁰Noho ny amin'i Davida mpanomponao Dia aza mampiala maina ny tavan'ny voahosotrao.

¹¹Jehovah efa nianiana tamin'i Davida, Ary marina izany ka tsy hitsoahany Ny ateraky ny kibonao no hapetrako eo ambonin'ny seza fiandriananao.

¹²Raha hotandreman'ny zanakao ny fanekeko Sy ny teny vavolombeloko izay hampianariko azy, Dia hipetraka eo ambonin'ny seza fiandriananao mandrakizay doria kosa ny zanany.

¹³Fa Jehovah efa nifidy an'i Ziona. Ary naniry azy ho fonenany.

¹⁴Ity, hoy Izy, no fitsaharako mandrakizay doria; Eto no honenako, fa efa niriko ity.

¹⁵Hotahiko tokoa ny fihinana ao; Hovokisako hanina ny malahelo ao.

¹⁶Ny mpisorona ao dia hampitafiko famonjena; Ary hihoby tokoa ny olo-masina ao.

¹⁷Ao no hampitsimohako tandroka ho an'i Davida Sy hanamboarako jiro ho an'ny voahosotro.

¹⁸Ny fahavalony hampitafiko henatra; Fa eo aminy kosa no hamirapiratra ny satro-boninahiny.