Read Malagasy Salamo 135 Bible Online

Salamo 135 - Malagasy bible

Salamo 135

¹Haleloia. Miderà ny anaran'i Jehovah; Miderà, ianareo mpanompon'i Jehovah,

²Hianareo izay mpitoetra ao an-tranon'i Jehovah, Eo anatin'ny kianjan'ny tranon'Andriamanitsika.

³Miderà an'i Jehovah, fa tsara Izy; Mankalazà ny anarany, fa mahafinaritra izany.

⁴Fa Jakoba nofidin'i Jehovah ho Azy, Ary Isiraely ho rakitra soa ho Azy,

⁵Fa fantatro fa lehibe Jehovah, Ary ambonin'ny andriamanitra rehetra ny Tompontsika.

⁶Manao izay sitrapony rehetra Jehovah, Na any amin'ny lanitra, na etỳ ambonin'ny tany, Na any amin'ny ranomasina sy ny rano lalina rehetra.

⁷Mampiakatra zavona avy amin'ny faran'ny tany Izy; Manao helatra arahin-dranonorana Izy; Mamoaka ny rivotra avy ao an-trano fitehirizany Izy,

⁸Dia Ilay namely ny voalohan-terak'i Egypta, Na olona, na biby.

⁹Nanatitra famantarana sy fahagagana teo aminao Izy, ry Egypta ô, Eny, tamin'i Farao sy ny mpanompony rehetra,

¹⁰Dia Ilay namely ny jentilisa maro Ka nahafaty mpanjaka mahery,

¹¹Dia Sihona, mpanjakan'ny Amorita, Sy Oga, mpanjakan'i Basana, Ary ny fanjakan'i Kanana rehetra;

¹²Ary ny taniny nomeny ho lova, Eny, ho lovan'ny Isiraely olony.

¹³Jehovah ô, mandrakizay ny anaranao; Jehovah ô, hihatra amin'ny taranaka fara mandimby ny fahatsiarovana Anao.

¹⁴Fa hanome rariny ny olony Izy Ary hanenina ny amin'ny mpanompony.

¹⁵Ny sampin'ny jentilisa dia volafotsy sy volamena, Asan'ny tànan'olona;

¹⁶Manam-bava izy, fa tsy miteny; Mana-maso izy, fa tsy mahita;

¹⁷Manan-tsofina izy, fa tsy mandre; Ary tsy misy fofonaina ao am-bavany.

¹⁸Ho tahaka azy izay manao azy Sy izay rehetra matoky azy.

¹⁹Misaora an'i Jehovah, ry taranak'Isiraely; Misaora an'i Jehovah, ry taranak'i Arona;

²⁰Misaora an'i Jehovah, ry taranak'i Levy; Hianareo izay matahotra an'i Jehovah, misaora an'i Jehovah.

²¹Isaorana avy any Ziona anie Jehovah, Izay mitoetra any Jerosalema. Haleloia.