Read Malagasy Salamo 21 Bible Online

Salamo 21 - Malagasy bible

Salamo 21

¹Ho an'ny mpiventy hira. Salamo nataon'i Davida. Jehovah ô, ny herinao no hifalian'ny mpanjaka; ary endrey ny haben'ny hiravoravoany amin'ny famonjenao!

²Ny nirin'ny fony dia nomenao azy, ary ny nangatahin'ny molony tsy mba nolavinao.

³Fa notsenainao fitahiana soa izy; teo an-dohany nasianao satro-boninahitra tena volamena.

⁴Aina no nangatahiny taminao, dia nomenao azy izany, dia andro lava mandrakizay doria.

⁵Lehibe ny voninahiny amin'ny famonjenao; Laza sy voninahitra no nataonao taminy.

⁶Fa nataonao ho fitahiana mandrakizay izy; ampifalinao indrindra amin'ny tavanao izy.

⁷Fa ny mpanjaka matoky an'i Jehovah, ary noho ny famindram-pon'ny Avo Indrindra dia tsy hangozohozo izy.

⁸Ho azon'ny tananao ny fahavalonao rehetra; eny, ho azon'ny tananao ankavanana ny mankahala anao;

⁹Hataonao tahaka ny fatana misy afo mirehitra izy amin'ny andro hisehoanao, Jehovah handany azy amin'ny fahatezerany, ary handevona azy ny afo.

¹⁰Ny zanany haringanao tsy ho eo amin'ny tany, ary ny taranany tsy ho eo amin'ny zanak'olombelona;

¹¹Fa nikasa hanisy ratsy anao izy, ka namoron-kevi-dratsy fa tsy nahefa.

¹²Fa hampiamboho azy ianao; ny tsipìkanao no ikendrenao ny tavany.

¹³Misandrata amin'ny herinao, Jehovah ô, hihira sy hankalaza ny herinao izahay.