Read Malagasy Salamo 25 Bible Online

Salamo 25 - Malagasy bible

Salamo 25

¹Nataon'i Davida. Aminao, Jehovah ô, no anandratako ny fanahiko.

²Andriamanitro ô, Hianao no itokiako, aoka tsy ho menatra aho; aoka tsy hifalian'ny fahavaloko aho.

³Eny, tsy hisy ho menatra izay rehetra miandry Anao; fa izay mivadika foana no ho menatra.

⁴Ampahafantaro ny lalanao aho, Jehovah ô; ampianaro ny sitrakao aho.

⁵Tariho amin'ny fahamarinanao aho, ka ampianaro; fa Hianao no Andriamanitry ny famonjena ahy; Hianao no andrasako mandritra ny andro.

⁶Tsarovy ny antranao sy ny indrafonao, Jehovah ô, fa hatrizay hatrizay ireny.

⁷Aza ny fahotan'ny fahatanorako, na ny ratsy nataoko, no tsarovanao; fa aoka ho araka ny famindram-ponao no hahatsiarovanao ahy, noho ny fahasoavanao Jehovah ô,

⁸Tsara sy mahitsy Jehovah, ka izany no ampianarany ny mpanota ny lalana.

⁹Mitarika ny mpandefitra amin'ny marina Izy, ary mampianatra ny mpandefitra ny lalany.

¹⁰Ny lalan'i Jehovah rehetra dia famindram-po sy fahamarinana amin'izay mitandrina ny fanekeny sy ny teni-vavolombelony.

¹¹Noho ny anaranao, Jehovah ô, dia mamelà ny heloko, fa lehibe izany.

¹²Iza no lehilahy matahotra an'i Jehovah? Izy no hampianariny izay lalana tokony hofidiny.

¹³Ny fanahiny hitoetra amin'ny soa; ary ny taranany handova ny tany.

¹⁴Ny fisainan'i Jehovah asehony amin'izay matahotra Azy, ary ny fanekeny no hampahafantariny azy.

¹⁵Ny masoko mijery an'i Jehovah mandrakariva; fa Izy no nanafaka ny tongotro tamin'ny fandrika harato.

¹⁶Todiho aho, ka amindrao fo, fa irery aho ka mahantra.

¹⁷Ny fahorian'ny foko efa mihalehibe; afaho amin'ny fahatereko aho.

¹⁸Jereo ny fahoriako sy ny mavesatra amiko, ka mamelà ny fahotako rehetra.

¹⁹Jereo ny fahavaloko, fa maro izy; ary loza ny fankahalàny ahy.

²⁰Arovy ny fanahiko, ka vonjeo aho; aoka tsy ho menatra aho, fa mialoka aminao.

²¹Aoka ny tsi-fisian-tsiny sy ny fahitsiana no hiaro ahy; fa miandry Anao aho.

²²Andriamanitra ô, afaho ny Isiraely, amin'ny fahoriany rehetra.