Read Malagasy Salamo 33 Bible Online

Salamo 33 - Malagasy bible

Salamo 33

¹Mihobia ho an'i Jehovah ianareo, ry olo-marina; fa mendrika hataon'ny olo-mahitsy ny fiderana.

²Miderà an'i Jehovah amin'ny lokanga; mankalazà Azy amin'ny valiha tory folo.

³Mihirà fihiram-baovao ho Azy; mitendre tsara amin'ny feo fifaliana.

⁴Fa mahitsy ny tenin'i Jehovah, ary ny asany rehetra dia mahatoky avokoa.

⁵Tia fahamarinana sy rariny Izy; henika ny famindram-pon'i Jehovah ny tany.

⁶Ny tenin'i Jehovah no nanaovana ny lanitra; ary ny fofonain'ny vavany no nanaovana ny hamaroany rehetra.

⁷Mampiavosa ny rano ao an-dranomasina ho toy ny antontan-javatra Izy; mitahiry ny rano lalina ao an-trano fitehirizana Izy.

⁸Aoka hatahotra an'i Jehovah ny tany rehetra; aoka hangovitra eo anatrehany ny mponina rehetra amin'izao tontolo izao.

⁹Fa Izy no niteny dia ary izany; Izy no nandidy, dia nitoetra mafy izany.

¹⁰Jehovah mahafoana ny fisainan'ny firenen-tsamy hafa; Mahatsinontsinona ny hevitry ny olona Izy.

¹¹Ny fisainan'i Jehovah maharitra mandrakizay, ny hevitry ny fony mahatratra ny taranaka fara mandimby.

¹²Sambatra ny firenena izay manana an'i Jehovah ho Andriamaniny, dia ny olona nofidiny ho lovany.

¹³Eny an-danitra no itsinjovan'i Jehovah, mijery ny zanak'olombelona rehetra Izy;

¹⁴Eo amin'ny fonenany no ijereny ny mponina rehetra ambonin'ny tany,

¹⁵Dia Izy Mpamorona ny fon'izy rehetra sy Mpamantatra ny asany rehetra.

¹⁶Tsy misy mpanjaka voavonjin'ny hamaroan'ny miaramilany; ny olo-mahery tsy voavonjin'ny haben'ny heriny.

¹⁷Ny soavaly tsy azo itokiana ho famonjena, ary tsy mahavonjy ny haben'ny heriny.

¹⁸Indro, ny mason'i Jehovah mitsinjo izay matahotra Azy, dia izay manantena ny famindram-pony,

¹⁹mba hanafaka ny fanahiny amin'ny fahafatesana, sy hamelona azy, raha misy mosary.

²⁰Ny fanahintsika miandry an'i Jehovah; famonjena antsika sy ampingantsika Izy.

²¹Fa Izy no ifalian'ny fontsika, satria ny anarany masina no itokiantsika.

²²Jehovah ô, aoka ny famindram-ponao hitoetra aminay araka ny anantenanay Anao.