Read Malagasy Salamo 34 Bible Online

Salamo 34 - Malagasy bible

Salamo 34

¹Nataon'i Davida tamin'izy nody adala teo anatrehan'i Abimeleka, dia noroahiny ka lasa nandeha. Hisaotra an'i Jehovah lalandava aho; ho eo am-bavako mandrakariva ny fiderana Azy.

²Jehovah no reharehan'ny fanahiko; hahare izany ny mpandefitra ka ho fay.

³Miaraha mankalaza an'i Jehovah amiko; ary aoka hiara-manandratra ny anarany isika.

⁴Mitady an'i Jehovah aho, dia mamaly ahy Izy ka manafaka ahy amin'ny tahotro rehetra.

⁵Mijery Azy ireo ka miramirana, sady tsy mangaihay ny tavany.

⁶Ity olo-mahantra ity niantso, dia nihaino Jehovah ka namonjy azy tamin'ny fahoriany rehetra.

⁷Ny Anjelin'i Jehovah mitoby manodidina izay matahotra Azy ka mamonjy azy.

⁸Andramo ka izahao fa tsara Jehovah; sambatra izay olona mialoka aminy.

⁹Matahora an'i Jehovah, ianareo olony masina;fa tsy hanan-java-mahory izay matahotra Azy.

¹⁰Na dia ny liona tanora aza tsy ampy hanina ka noana. Fa izay mitady an'i Jehovah kosa dia tsy ho orin-java-tsoa akory.

¹¹Avia, anaka, mihainoa ahy; ny fahatahorana an'i Jehovah no hampianariko anareo.

¹²Na iza na iza ianao no maniry fiainana ka tia andro maro hahitana ny soa,

¹³Dia arovy ny lelanao amin'ny ratsy ary ny molotrao mba tsy hiteny fitaka.

¹⁴Halaviro ny ratsy, manaova soa; mitadiava fihavanana, ka araho izany.

¹⁵Ny mason'i Jehovah dia mitsinjo ny marina, ary ny sofiny mihaino ny fitarainany.

¹⁶Ny tavan'i Jehovah tezitra amin'ny mpanao ratsy kosa, mba hofongorany tsy ho eo amin'ny tany ny fahatsiarovana azy.

¹⁷Mitaraina ny marina, ary mihaino azy Jehovah ka mamonjy azy amin'ny fahoriany rehetra.

¹⁸Akaikin'izay manana fo mangorakoraka Jehovah, ary mamonjy izay torororo fanahy.

¹⁹Maro ny fahorian'ny marina; nefa Jehovah manafaka azy amin'izany rehetra izany.

²⁰Miaro ny taolany rehetra izy; tsy hisy ho tapaka ireny na dia iray akory aza.

²¹Hahafaty ny ratsy fanahy ny fahoriana; ary ny mankahala ny olo-marina hohelohina.

²²Fa Jehovah manavotra ny fanahin'ny mpanompony, ka tsy mba hisy hohelohina izay rehetra mialoka aminy.