Read Malagasy Salamo 36 Bible Online

Salamo 36 - Malagasy bible

Salamo 36

¹Ho an'ny mpiventy hira. Nataon'i Davida, mpanompon'i Jehovah. Ny ota milaza ato am-poko ny amin'ny ratsy fanahy hoe: tsy misy fahatahorana an'Andriamanitra ao aminy.

²Fa miarahaba tena izy ny amin'ny tsy hahitana ny helony ka hankahalana azy.

³Ny tenin'ny vavany dia faharatsiana sy fitaka; efa nihadala izy ka nitsahatra tsy hanao soa.

⁴Faharatsiana no saintsaininy eo am-pandriany; mitsangana eo amin'ny lalana tsy mety izy; ny ratsy tsy mba laviny akory.

⁵Jehovah ô, mipaka amin'ny lanitra ny famindram-ponao; mihatra amin'ny rahona ny fahamarinanao.

⁶Ny fahamarinanao dia tahaka ny tendrombohitra avo dia avo; ny fitsaranao dia toy ny lalina indrindra; ny olona sy ny biby dia samy vonjenao, Jehovah ô,

⁷Endrey ny hatsaran'ny famindram-ponao, Andriamanitra ô! ka mialoka eo amin'ny aloky ny elatrao ny zanak'olombelona.

⁸Voky ny matavy ao an-tranonao izy; ary ny ony fampifalianao no ampisotroanao azy.

⁹Fa ao aminao no misy loharanon'aina; ny fahazavanao no hahitanay fahazavana.

¹⁰Ampahareto amin'izay mahalala Anao ny famindram-ponao, ary ny fahamarinanao amin'ny mahitsy fo.

¹¹Aoka tsy hanitsaka ahy ny tongotry ny mpiavonavona, na hampandositra ahy ny tanan'ny ratsy fanahy.

¹²Indreo! efa lavo ny mpanao ratsy; naripaka izy ka tsy maharina.