Read Malagasy Salamo 38 Bible Online

Salamo 38 - Malagasy bible

Salamo 38

¹Salamo nataon'i Davida. Ho fampahatsiarovana. Jehovah ô, aza ny fahatezeranao no ananaranao ahy; ary aza ny fahaviniranao no amaizanao ahy.

²Fa mitsatoka amiko ny zana-tsipìkanao,ary manindry ahy mafy ny tananao,

³Tsy misy fahasalamana ny nofoko noho ny fahatezeranao; tsy misy tsy marary ny taolako noho ny fahotako.

⁴Fa ny heloko efa mihoatra ny lohako; tahaka ny entana mavesatra izy ka tsy zakako.

⁵Maimbo sady mihady ny feriko noho ny hadalako.

⁶Mitanondrika sy mijoretra indrindra aho, ary misaona mandrakariva.

⁷Ary ny vaniako henika ny aretina mahamay, ka tsy misy fahasalamana ny nofoko.

⁸Marikoditra aho sady torovana indrindra; midradradradra aho noho ny fitolokon'ny foko.

⁹Ry Tompo ô, eo anatrehanao ny faniriako rehetra;ary ny fisentoako tsy mba miafina aminao.

¹⁰Miemponempona ny foko, lany ny heriko, ary ny fahiratan'ny masoko aza efa nandao ahy.

¹¹Ny olo-malalako sy ny sakaizako aza efa manalavitra ny fahoriako; Ary ny havako mijanona eny lavitra eny.

¹²Mamela-pandrika izay mitady ny aiko; ary izay mitady hanimba ahy miteny fanimbana,sy misaim-pitaka mandrakariva.

¹³Fa izaho dia tahaka ny marenina ka tsy mandre, ary tahaka ny moana ka tsy mahaloa-bava;

¹⁴Eny, dia tahaka ny olona tsy mandre, sady tsy misy teny havaly eo am-bavany.

¹⁵Fa ianao no antenaiko Jehovah ô; ianao no hamaly, ry Tompo Andriamanitra ô.

¹⁶Fa hoy izaho: sao dia hifalian'izy ireo anie aho;ary raha mibolisatra ny tongotro, dia hirehareha amiko izy.

¹⁷Fa efa ho lavo aho, ary ny fanaintainako dia tsaroako mandrakariva.

¹⁸Fa ny heloko no hambarako; matahotra aho noho ny fahotako.

¹⁹Fa ny fahavaloko velona ihany sady mahery; ary maro no mandrafy ahy tsy ahoan-tsy ahoana;

²⁰Ary mamaly ratsy ny soa izy ireo ka mandrafy ahy ho valin'ny fanarahako ny tsara.

²¹Aza mahafoy ahy,Jehovah ô; Ry Andriamanitro ô, aza manalavitra ahy.

²²Faingàna hamonjy ahy, ry Tompo, Mpamonjy ahy ô.