Read Malagasy Salamo 44 Bible Online

Salamo 44 - Malagasy bible

Salamo 44

¹Ho an'ny mpiventy hira. Nataon'ny Koraita. Maskila. Ny sofinay no nandrenesanay, Andriamanitra ô, ny razanay nilaza taminay ny asa nataonao tamin'ny androny, dia tamin'ny andro fahiny.

²Ny tananao no nandroahanao ny firenen-tsamy hafa, fa izy kosa nampitoerinao; efa nampahorinao ny firenena maro, fa izy kosa nataonao mahafeno tany.

³Fa tsy ny sabany no nahazoany ny tany, ary tsy ny sandriny no namonjy azy; fa ny tananao ankavanana sy ny sandrinao ary ny fahazavan'ny tavanao, satria efa sitrakao izy.

⁴Hianao dia Hianao no Mpanjakako, Andriamanitra ô; Mandidia famonjena ho an'i Jakoba.

⁵Hianao no hanosehanay ny fahavalonay; ny anaranao no hanitsahanay izay mitsangana hamely anay.

⁶Fa tsy ny tsipikako no itokiako, ary ny sabatro tsy hahavonjy ahy.

⁷Fa namonjy anay tamin'ny fahavalonay Hianao, ary ny nankahala anay dia nataonao menatra.

⁸Andriamanitra no ankalazainay mandrakariva; ary ny anaranao no hoderainay mandrakizay.

⁹Fa efa nanary anay ianao ka nampahamenatra anay, ary tsy mba mivoaka miaraka amin'ny antokon'ny miaramilanay Hianao.

¹⁰Ataonao miamboho ny fahavalonay izahay, koa ny mankahala anay dia nanaram-po namabo.

¹¹Atolotrao tahaka ny ondry hohanina izahay, ary aelinao any amin'ny firenen-tsamy hafa.

¹²Mivarotra ny olonao tsy vola tsy harena Hianao, ka tsy mahazo tombony amin'ny vidiny.

¹³Ataonao fandatsan'ny olona miray monina aminay izahay, dia fanakora sy faneson'izay manodidina anay.

¹⁴Ataonao ho ambentinteny amin'ny firenen-tsamy hafa izahay, dia fihifikifihan-doha amin'ny olona maro.

¹⁵Tsaroako mandrakariva ny fahafaham-boninahitro, ary efa manafotra ahy ny fangaihaizako,

¹⁶Noho ny feon'ny mpanaratsy sy ny mpanamavo, noho ny fahavalo sy ny mpamaly ratsy.

¹⁷Izany rehetra izany no manjo anay, nefa tsy manadino anao izahay ary tsy mivadika ny fanekenao.

¹⁸Tsy mihemotra ny fonay, ary tsy miala amin'ny lalanao ny dianay.

¹⁹Nefa Hianao nanorotoro anay teo amin'ny fitoeran'ny amboadia sy nanarona anay tamin'ny aloky ny fahafatesana.

²⁰Raha nanadino ny anaran'Andriamanitray izahay, na nananty tanana tamin'ny andriamani-kafa,

²¹Tsy handinika izany va Andriamanitra? Fa Izy mahalala ny miafina ao am-po.

²²Fa noho ny aminao no amonoana anay mandrakariva; toy ny ondry hovonoina no fijery anay.

²³Mifohaza, ry Tompo ô, nahoana no matory Hianao? Mitsangàna, aza manary mandrakizay.

²⁴Nahoana no manafina ny tavanao Hianao, ka manadino ny fahantranay sy ny fahorianay?

²⁵Fa miankohoka amin'ny vovoka ny fanahinay, miraikitra amin'ny tany ny kibonay.

²⁶Mitsangàna hamonjy anay, ary avoty izahay araka ny famindram-ponao.